«Баян Сұлу» кондитерлік фабрикасын дамытудың жаңа кезеңі

Қазақстандағы кондитерлік өнімдердің ірі өндірушілерінің бірі «Баян Сұлу» АҚ фабрикасы өзінің өндірістік қуатын кеңейтуде. Бұл қадам ішкі және халықаралық нарықтарда өнімге өсіп келе жатқан сұранысты қанағаттандыруға бағытталған.

Кезекті жобаны іске асыру шеңберінде жаңа өндірістік желілерді іске қосу жоспарлануда, бұл түржинақты кеңейтуге және шығарылатын өнім көлемін жылына 13 мың тоннаға арттыруға мүмкіндік береді. Өндірістің заманауи технологияларын енгізу өнімнің сапасын арттыруға және оның әлемдік стандарттарға сәйкестігін қамтамасыз етуге, компанияның халықаралық нарықтардағы позициясын нығайтуға мүмкіндік береді.

«Қуатты кеңейту – бұл өндіріске салынған инвестиция ғана емес, сонымен қатар «Баян Сұлу» брендін сапа мен дәстүрдің символы ретінде нығайтудың маңызды қадаым. Біз өз клиенттерімізге сүйікті тәттілердің көп түрін ұсынуға тырысамыз», - деп атап өтті «Баян Сұлу» АҚ Басқарма төрағасы Тимур Садықов.

Жоба «Қазақстанның Даму Банкі» АҚ (бұдан әрі – Банк, ҚДБ, «Бәйтерек» холдингінің еншілес құрылымы) қаржылық қолдауымен іске асырылады. Жобаның жалпы құны 14 млрд теңге, Банктің үлесі – 6 млрд теңге.

Отандық өндірушілерді қолдау – ҚДБ қызметінің басым бағыттарының бірі. Біз «Баян Сұлу» АҚ сияқты табысты кәсіпорындардың дамуына үлес қоса алатынымызды мақтан тұтамыз. Бұл жоба қазақстандық өнімнің халықаралық нарықтардағы позициясын нығайтып, қосымша жұмыс орындарын ашады, бұл ел экономикасын дамытудың стратегиялық мақсаттарына сәйкес келеді.

Бүгінде «Баян Сұлу» АҚ өнімдерін ТМД елдеріне, Еуропа мен Азияға белсенді экспорттап, Қазақстанды кондитерлік өнімдердің сенімді өндірушісі ретінде танытып келеді. Жоғары сапа мен ерекше дәм үйлесімі брендті шетелдік тұтынушылар арасында танымал етті. 1974 жылы құрылған фабрика 350-ден астам өнім шығарады және 1,5 мыңнан астам адамды жұмыспен қамтамасыз етіп отыр. Өндірістің жылдық көлемі 85 мың тоннаға жетеді.

Компания әлеуметтік бастамаларға белсенді қатысып, балалар үйлерінің тәрбиеленушілерін қолдайды, «Мектепке жол» бағдарламасы аясында белгілі бір санаттағы оқушыларды қажетті заттармен және керек-жарақтармен қамтамасыз етеді, зейнеткерлік жастағы бұрынғы қызметкерлеріне қамқорлық көрсетеді, сондай-ақ компания спорттық және мәдени іс-шараларға, оның ішінде Қазақстанның жетекші театрларында қойылатын спектакльдерге демеушілік қолдау көрсетеді.

• 29.01.2025
• 41