ҚДБ мемлекеттік органдардың серверлік инфрақұрылымын дамытуға 34 млрд теңге қарыз қаражатын бөледі

«Қазақстанның Даму Банкі» АҚ (бұдан әрі – Банк, ҚДБ) цифрлық трансформация және технологиялық даму бойынша негізгі мәселелер талқыланған Digital Almaty-2025 форумына қатысты.

«Тұрақты даму мақсаттары: Тұрақты кәсіпорыннан тұрақты өңірге дейін» панельдік сессия аясында ҚДБ Басқарма төрағасы Марат Елібаев БҰҰ-ның тұрақты даму мақсаттарына (бұдан әрі – ТДМ) бейілділігі аясында Банк қызметі және цифрландыруды енгізу «Индустрияландыру, инновациялар және инфрақұрылым» 9-ТДМ-ге қалай қол жеткізуге мүмкіндік беретіні туралы айтып өтті. Банк өз қызметінде 17 ТДМ-ның 14-іне бейілділік танытатынын айта кету керек.

Іс-шара аясында ҚДБ мен «Ұлттық ақпараттық технологиялар» АҚ (бұдан әрі – «ҰАТ» АҚ) арасында несие желісін ашу туралы келісімге қол қойылды. Бұл келісім Қазақстан Республикасы мемлекеттік органдарының ақпараттық жүйелерін серверлік жабдықпен қамтамасыз ету жобасын жүзеге асыруға бағытталған. Аталған жоба «ҰАТ» АҚ үшін қарыз қаражаты пайдаланылатын алғашқы жоба болып табылады.

Қазақстан Республикасының «электрондық үкімет» ақпараттық-коммуникациялық инфрақұрылымының Операторы ретінде «ҰАТ» АҚ мемлекеттік органдар үшін АКТ-инфрақұрылымын дамыту бойынша маңызды жобаны жүзеге асыруға кірісті. Жоба аясында заманауи серверлік жабдық сатып алынып, орнатылады. Жобаның жалпы құны – 34,3 млрд теңге.

28 қаңтарда өткен Үкіметтің кеңейтілген отырысында Қазақстанның Президенті Қасым-Жомарт Тоқаев цифрлық технологияларды кеңінен енгізудің маңыздылығын атап өтіп, сапалы деректер мен олардың сенімді қорғалуына негізделген өзін-өзі қамтамасыз ететін цифрлық экожүйені құру міндетін қойды.

Бұл жобаны іске асыру мемлекеттік ақпараттық жүйелердің тұрақты және сенімді жұмысын қамтамасыз ететін инфрақұрылымды құруға мүмкіндік береді. Бұл тек деректерді қорғау деңгейін арттырып қана қоймай, сонымен қатар елдің цифрлық трансформациясы жолындағы маңызды қадам болып, мемлекеттік қызметтердің сапасын жақсартуға ықпал етеді

«ҰАТ» АҚ-да ҚДБ-мен бірлесіп қаржыландыруды тарту жобаны іске асыру үшін қажетті қолдауды қамтамасыз ететінін атап өтті, бұл серверлік инфрақұрылымды бюджет қаражатын айтарлықтай пайдаланусыз жылдам дамытуға мүмкіндік береді. Бұл жоба мемлекеттік жүйелердің цифрлық қауіпсіздігін дамыту және нығайтудағы маңызды қадам болмақ..

• 05.02.2025
• 58