Түркістан облысына барып, тұрғындармен кездестім, ірі су шаруашылығы нысандарының жұмысын тексердім.

Азаматтармен кездесуде өңірді қажет су көлемімен қамтамасыз ету бойынша атқарылған жұмыстар туралы баяндадым.

Былтыр біз көрші елдермен белсенді келіссөз жүргіздік, осының нәтижесінде еліміздің оңтүстігіндегі шаруаларды суармалы сумен толық қамтамасыз еттік. Енді біз «Қазсушар» мекемесінің жергілікті шаруалармен жасаған келісімшарттарының қаншалықты орындалғанын мұқият тексереміз. Келісімшарт жасамай, заңсыз су беру фактілері бар-жоғын анықтаймыз.

Осыған дейін министрліктің Ішкі аудит департаментінің өкілдері Түркістан облысына келген болатын. Осы аптадан бастап біздің мамандардан жасақталған тағы бір жұмыс тобы тексеріс жүргізеді.

Түркістан облысының тұрғындары өз кезегінде ирригация және дренаж жүйелерін реконструкциялау, жекелеген гидротехникалық құрылыстардың жай-күйі, суармалы суды бөлу, су беру жөнінде келісімшарттар, жаңа су қоймаларын салу, білікті мамандар даярлау және дихандарға субсидия беруге қатысты сұрақтарын қойды.

Азаматтармен кездесуден кейін Шардара су қоймасының жай-күйін және оның бөгетінің жұмысын тексердім. Айта кету керек, 2023 жылдың соңында бөгетті реконструкциялау жұмыстары аяқталды.

Биыл қаңтар айында Сырдария өзені арқылы Шардара су қоймасына 2,6 млрд текше метр су келгенін атап өткім келеді. Бұл бастапқы болжамнан 100 млн текше метрге көп.

• 06.02.2025
• 28