Өзбекстанмен екіжақты су ынтымақтастығын тереңдету жөніндегі бірлескен жұмыс тобының 12-ші отырысы аясында Өзбекстанның Су шаруашылығы министрі Шавкат Хамраевпен кездестім. 1 қазанға дейін Өзбекстан Қазақстанға 16 млрд текше метр су жібереді деп уағдаластық.

Өткен су шаруашылығы маусымында (2023 жылғы қазан – 2024 жылғы қазан) Қазақстанға 15 млрд текше метр су жіберілгенін атап өткім келеді. Осылайша, биыл бұл көлем 1 млрд текше метрге ұлғаяды деп күтілуде.

Сондай-ақ, өзбек тарапы биыл суару маусымында «Достық» каналы арқылы тұрақты су беруді қамтамасыз етуге көмектеседі.

Бұдан бөлек, мемлекетаралық каналдарда бірлескен жөндеу жұмыстарын жүргізу жөнінде келісімге келдік. Бұл Қазақстанның Түркістан облысы мен Өзбекстанның Жизақ облысының шаруаларына су беру сапасын жақсартады.

Кездесуде талқыланған тағы бір тақырып Сырдария өзенінде суды есепке алуды автоматтандыру мәселесі болды. Осыған дейін біз есеп жүйесі орнатылатын алғашқы 10 нүктені анықтадық. Әр елдің аумағында 5 нүктеден белгіленді.

Бүгінгі таңда біз жобаның техникалық-экономикалық негіздемесін әзірлеу үшін техникалық тапсырманы келістік. Ақпан айында ортақ іс-қимылды талқылау үшін халықаралық ұйымдардың өкілдерімен бірлескен жұмыс тобының кездесуі өтеді.

• 06.02.2025
• 28