Қазақстан мен ЕИБ коммуналдық инфрақұрылымды жаңғыртуды талқылады

ҚР Өнеркәсіп және құрылыс министрі мен Еуропалық инвестициялық банк (ЕИБ) және Германия халықаралық ынтымақтастық қоғамының (GIZ) FELICITY II жобасының өкілдері арасында жұмыс кездесуі өтті. Қанат Шарлапаев халықаралық серіктестермен еліміздің коммуналдық секторын жаңғырту перспективаларын талқылады.

Басты назар сумен жабдықтау және су бұру жүйелерін жаңарту, оның ішінде заманауи тазарту құрылыстарын салу мәселелеріне аударылды.  Коммуналдық инфрақұрылымның тозуы қомақты инвестиция мен озық технологияларды қажет етеді, сондықтан кездесу қатысушылары ресурстарды тиімді басқару үшін цифрлық шешімдерді енгізу мен қаржыландырудың ықтимал нұсқаларын қарастырды.

Еуропалық инвестициялық банк Қазақстандағы басым инфрақұрылымдық жобаларды қолдауға дайын екенін растады.

Нәтижесінде тараптар инфрақұрылымның ағымдағы жағдайына бірлескен талдау жүргізуге, қаржыландыру тетіктерін әзірлеуге және коммуналдық секторды жаңғырту бойынша пилоттық жобаларды дайындауға келісті.  Өнеркәсіп және құрылыс министрлігі мемлекеттік қызмет көрсету сапасын арттыру және қоршаған ортаға түсетін салмақты азайту мақсатында халықаралық серіктестермен ынтымақтастықты жалғастырады.

• 06.02.2025
• 49