Қазақстан мен Жапония: маңызды минералдар мен сейсмикалық қауіпсіздік саласындағы ынтымақтастықты дамыту

Бүгін ҚР Өнеркәсіп және құрылыс министрі Қанат Шарлапаев Жапония Премьер-Министрінің арнайы кеңесшісі, Парламенті Өкілдер палатасының мүшесі Акихиса Нагашимамен кездесу өткізді.

Кездесу маңызды минералдар мен сейсмикалық қауіпсіздік және апаттар қаупін бағалау мәселелері бойынша одан әрі ынтымақтастық мүмкіндіктерін талқылау мақсатында өтті.

Жапония Қазақстанның Азиядағы негізгі сауда-экономикалық серіктестерінің бірі, сонымен қатар жалпы инвестициясы 7,8 млрд доллардан асатын Қазақстандағы ең ірі шетелдік инвесторлардың ондығына кіреді.

Өнеркәсіп тауарлары бойынша Қазақстан мен Жапония арасындағы тауар айналымы 2024 жылдың қаңтар-қараша аралығында 1,6 млрд АҚШ долларын құрады.

Тау-кен металлургия саласындағы ынтымақтастық екі ел үшін де стратегиялық маңызы баржәне әртүрлі бағытта дамып келеді. Қазақстанның Жапонияға негізгі экспорттық тауарларының ішінде ферроқорытпалар, тантал және алюминий бар.

Сондай-ақ, Қазақстан мен Жапония сейсмикалық қауіпсіздік саласында да ынтымақтасады. Жапония халықаралық ынтымақтастық агенттігімен JICA ынтымақтастық аясында «ҚазҚСҒЗИ» АҚ мамандары сейсмикалық қауіпсіздік және апаттар қаупін бағалау бойынша тереңдетілген оқытуды сәтті аяқтады.

«Mitsui & Co, Ltd» компаниясымен серіктестікті дамыту мақсатында сейсмикалық платформалар жасаудың озық әдістерін зерделеу және құрылыс жобаларына заманауи сейсмикалық оқшаулау жүйелерін біріктіру бойынша сапар жоспарланған.

• 06.02.2025
• 53