Бүгін ҚР Қаржы министрлігінің кеңейтілген алқа отырысы өткізіліп, онда 2024 жылда атқарылған жұмыстардың қорытындысы шығарылып, 2025 жылға арналған жоспарлар айқындалды.

Алқа отырысында Қазақстан Республикасының 2024 жылғы бюджетінің орындалуы, оның ішінде жеке кіріс базасын ұлғайту жөніндегі жұмыстың нәтижелері талқыланды. Мәселен, мемлекеттік бюджеттің кірістері бойынша жоспар (трансферттерді есептемегенде) 100,7% орындалды.
Таяу арада Бюджет кодексі қабылданатынын ескерсек, кодекс нормаларының күнделікті тәжірибеге тиімді енгізілуі маңызды. Құжатты толыққанды іске асыру үшін министрліктің бөлімшелері барлық қажетті заңға тәуелді актіні сапалы дайындауды, оларды уақтылы қабылдауды және сүйемелдеуді қамтамасыз етуі қажет.
2025 жылдағы тағы бір маңызды міндеті – цифрлы трансформациялауды жүзеге асыру. Жасанды интеллект, үлкен деректер және процестерді автоматтандыру орталық атқарушы органға мемлекеттік қаржы саласын тиімдірек басқаруға, тәуекелдерді азайтуға және әкімшілендіру ісінде ашықтықты арттыруға мүмкіндік береді. Осыған байланысты әр комитетте жасанды интеллектіні енгізу мен цифрландыру мәселелеріне жауапты төрағаның бір орынбасарын бекітуді тапсырдым.
Мемлекет басшысы Қасым-Жомарт Тоқаев жаңа құралдарды тартудың маңыздылығын атап өткен еді. Ал біздің міндет – мемлекеттік органдарға жобаларды іске асырудың балама жолдарын ұсыну. Бұл барлық деңгейде, соның ішінде жаңа цифрлы сервистер мен қызметтерді енгізу, жаңа инфрақұрылымды қалыптастыруды жеделдету, тиімді фискалды жүйені қамтамасыз ету бойынша бұдан да қарқын үйлесімді жұмысты талап етеді. Бұл әсіресе функциялары кеңейіп жатқан Мемлекеттік кірістер комитетіне қатысты. Тиімді жұмыс істеу үшін, оның ішінде мобильді топтар құруды және кеден бекеттерінің тәулік бойы режімге өтуін ескере отырып, жұмыс құрылымын қайта қарау қажет. Бұдан басқа республикалық бюджет қаражатын үнемдеу мақсатында бюджеттік кредиттерді, МЖӘ тәсілін, займдарды, ЕДБ қаражатын және басқа да тетіктерді қоса алғанда, қаржыландырудың ықтимал көздерін кешенді түрде қарау қажет.

• 07.02.2025
• 72