Осы аптада Қазақстанның салық жүйесін трансформациялау тәсілдеріне байланысты қоғамдық тыңдаулар басталған болатын

Алматыда шағын және орта бизнеске салынатын салық жүктемесін азайту мен бұл бағыттағы әкімшілендіру ісін жеңілдетуді қоса алғанда, салық жүйесін түзету бойынша ұсыныстар талқыланды.

Үкімет тұжырымдаған түзетулер салық салу бағытында негізгі өзгерістердің екі блогын қамтиды. Атап айтқанда, әкімшілендіру ісін жеңілдету үшін мөлшерлемелердің нақты өлшемі енгізілмек – 16%, 10%, 0% және одан босату қарастырылады. ҚҚС мөлшерлемесін 16% дейін көтеру ұсынылып отыр. Әсіресе министрлер кабинеті әлеуметтік маңызы бар салаларда жұмыс істейтін кәсіпорындарға қарастырылған жеңілдіктерді қоса алғанда, жергілікті компанияларға қолдау көрсету шараларына ерекше назар аударып отырғанын айта кеткен жөн. Мысалы, қазір аграрлық сектордағы шаруа қожалықтар ҚҚС төлеуден босатылған. Ал заңды тұлғалар оларға көрсетілетін жеңілдіктерге байланысты тиісті салықтардың тек 30% бюджетке төлейді. Жаңа тетікке сәйкес олардың ешқайсысы да ҚҚС төлемейтін болады. Бұл отандық ауылшаруашылық өнім өндірушілерінің (картоп, қызанақ, пияз және т.б. өнім өндірушілері) бәсекеге қабілеттігін арттыруға жол ашады. Ал 10 пайыздық мөлшерлеменің қандай салаларға қолданылатыны жайлы әлі бизнес өкілдерімен талқыланып жатыр.

ҚҚС мөлшерлемесін көтеру бюджеттің кірісін жыл сайын қосымша 4-5 трлн теңгеге арттырады. Аталған қаражат Ұлттық қорға тәуелді болуды азайтады: мемлекеттік қарыз деңгейін төмендетіп, қосымша ресурстарды инвестициялық жобаларды несиелеуге, даму институттарын өркендетуге, сондай-ақ ТКШ мен жылуэнергетикалық жүйені жаңғырту жұмыстарына бағыттауға мүмкіндік туады.

Бұдан бөлек ҚҚС байланысты есепке қою шегі 80 млн теңгеден 15 млн теңгеге дейін төмендемек. Бұл бизнесті қолдан (жасанды түрде) бірнеше бөлікке бөлуге қарсы күресті күшейтіп, барлық компанияға тең жағдай жасауға мүмкіндік береді. Бөлшек салық режимі қайта қаралып жатыр, сонымен қатар жұмысшылар санына байланысты шектеулер жойылады және іске асыру тетігі B2C сегментімен шектелетін болады.

• 13.02.2025
• 24