ҚДБ KASE халықаралық конференциясында беделді марапаттарға ие болды

«Қазақстанның Даму Банкі» АҚ Таяу Шығыс пен Орталық Азияның қор нарығын дамытудың негізгі үрдістеріне арналған KASE: Joining Tabadul Digital Hub халықаралық конференциясына қатысты. Қатысушылардың назары институционалдық инвесторлардың рөлі, инвестициялаудың жаңа құралдары және жаһандық нарықтағы қазақстандық акциялардың болашағында болды.

Конференцияның маңызды оқиғаларының бірі Қазақстанның қор нарығын дамытуға үлес қосқан KASE мүшелері мен листингтік компанияларын марапаттау рәсімі болды. ҚДБ «ESG облигациялар нарығының көшбасшысы – 2024» дипломымен марапатталды. Марапат Банктің борыштық нарықты дамытудағы және ірі инфрақұрылымдық және өнеркәсіптік жобаларды іске асыру үшін инвестициялар тартудағы негізгі рөлін растайды.

Бұдан бөлек, ҚДБ «Қаржы секторындағы үздік жылдық есеп – 2023» номинациясында тағы бір беделді марапатқа ие болды. Есептерді бағалауды KASE қызметкерлері жылдық есептерді дайындау және талдау саласындағы қазақстандық сарапшылармен бірлесіп жүргізді.

Айта кетейік, PwC верификациясынан өткен ҚДБ-ның 2023 жылғы жылдық есебі GRI стандарттарымен қатар, SASB, KASE Қазақстан қор биржасы мен ҚР Қаржы нарығын реттеу және дамыту агенттігінің ұсынымдарын да ескереді. Құжатта алғаш рет IFRS S1, S2 талаптарына сәйкес ақпарат ашылды, бұл ашықтықтың жоғары деңгейін және халықаралық озық тәжірибелерді ұстануды дәлелдейді.

Қосымша, 2024 жылы ҚДБ есебі PwC-дің «ESG-ақпаратты ашу бойынша үздік 50 қазақстандық компания» рейтингінің топ-10-на кірді, өткен жылмен салыстырғанда 9-шы орынға ие болып, 10 сатыға жоғарылады. Рейтингте тұрақты даму стратегиясы, корпоративтік басқару, қоғамға және экологиялық аспектілерге ықпал ету, сондай-ақ есеп беру тәжірибесі сияқты негізгі бағыттарды қамтитын 147 критерий бойынша 98 қазақстандық компания талданды.

Сондай-ақ, ҚДБ KASE платформасында ақпаратты ашудың және инвесторлармен тиімді коммуникациялар құрудың үздік тәжірибелерін көрсететін «Ашықтыққа ұмтылғаны үшін – 2024» марапатына ие болды.

«ҚДБ толық және уақтылы ақпарат бере отырып, инвесторлар үшін сенімді серіктес болуға ұмтылады. Банк инвесторлар үшін тартымды жағдайлар жасай отырып, корпоративтік басқару мен ақпараттық ашықтықтың үздік тәжірибелерін дәйекті түрде енгізеді. KASE марапаты – бұл біздің ұстанымымыздың дұрыстығын және ашықтықты нығайту мен нарықпен өзара іс-қимылды жетілдіру жөніндегі күш-жігерімізді мойындаудың айғағы», - деп атап өтті Басқарма төрағасының орынбасары Ботагөз Әбішева.

KASE: Joining Tabadul Digital Hub халықаралық конференциясы тәжірибе алмасу, инвестициялар тарту стратегияларын талқылау және Қазақстанның жаһандық қаржы нарығындағы ұстанымдарын нығайту үшін маңызды алаңға айналды.

• 19.02.2025
• 63