Белгілі спортшы Маңғыстау облысы әкімінің спорт мәселелері жөніндегі штаттан тыс кеңесшісі болып тағайындалды

Бүгін, 24 ақпан күні КСРО Олимпиадалық құрамының мүшесі, халықаралық дәрежедегі КСРО және Қазақстанның еңбек сіңірген спорт шебері, Маңғыстау облысының құрметті азаматы Асылбек Килимов Маңғыстау облысы әкімінің спорт мәселелері жөніндегі штаттан тыс кеңесшісі қызметіне тағайындалды.

Асылбек Килимов – кеңестік және қазақстандық бокс мектебінің жарқын өкілдерінің бірі. Ол 1980 жылдары КСРО-ның ең мықты спортшыларының қатарында болып, ел намысын халықаралық аренада абыроймен қорғады.

1984 жылдың көрсеткіші бойынша Асылбек Килимов Еуропаның ең үздік боксшысы, 75 келі салмақ дәрежесіне дейінгі әлем бойынша үшінші боксшысы атағына ие болған тұлға.

Кәсіби мансабында Килимов 196 жекпе-жек өткізіп, оның 186-сында жеңіске жетті, соның 82%-ын мерзімінен бұрын аяқтады. Ол халықаралық жарыстарда, соның ішінде АҚШ, Польша, КХДР, Түркия, ГДР, Чехословакия, Финляндия, Болгария және Таиландтағы беделді турнирлерде топ жарды.

Спорттық мансабын аяқтағаннан кейін де Асылбек Килимов бокс саласындағы қызметін жалғастырып, 1988–1991 жылдары КСРО Мемлекеттік спорт комитетінің Қазақстандағы жаттықтырушысы болды. Сондай-ақ, ол Еуропалық әуесқой бокс қауымдастығының (EABA) техникалық комиссиясының мүшесі ретінде жұмыс істеді. 1991 жылы оның басшылығымен Қазақстан құрамасы алғаш рет КСРО халықтарының X Спартакиадасында жалпыкомандалық есепте жеңіске жетті.

Маңғыстау облысы әкімінің баспасөз қызметі

• 24.02.2025
• 41