Маңғыстауда тұңғыш рет спорттық және жауынгерлік самбодан ел чемпионаты өтуде

Бүгін, 25 ақпан күні, Маңғыстау облысының әкімі Нұрдәулет Қилыбай аймақ тарихында алғаш рет ұйымдастырылып отырған ересектер арасындағы спорттық және жауынгерлік самбодан Қазақстан чемпионатының салтанатты ашылуына қатысты.

Байрақты бәсекеге еліміздің 17 облысы мен 3 қаласынан 600-ге жуық спортшы жиналды. Маңғыстау өңірінен 50 балуан облыс намысын қорғап, жеңіс тұғырынан көрінуге ниетті.

Облыс әкімі Нұрдәулет Қилыбай спортшыларға сәттілік тілей отырып, самбоның жай ғана спорт емес, оның аясы кең, маңызды құндылық екенін атап өтті.

- Самбо – тек спорт емес, ол патриотизм мен елге деген сүйіспеншілікті, тәртіп пен мәдениетті қалыптастыратын үлкен мектеп. Сондықтан самбоның аясын жай ғана спортпен шектеуге болмайды. Бүгінде өңірімізде бұл спорт қарқынды дамып келеді. 1000-ға жуық маңғыстаулық жас самбо күресімен шұғылданады. Спортшыларымыз тек ел ішінде ғана емес, әлемдік ареналарда да үздік нәтиже көрсетіп жүр. Аймақта 5 әлем чемпионы шыққанын мақтанышпен айта аламыз. Жарыс болған соң, жеңіс те, жеңіліс те бар. Бұл чемпионатта спортшылардың қоржыны жүлделерге толады деп сенемін. Жалпы қазақ жастары, қаракөз қыздарымыз әлемдік додаларда топ жарып, ел байрағын биікке көтере берсін! Баршаңызға сәттілік, – деді Нұрдәулет Қилыбай.

Чемпионат қорытындысы бойынша 1, 2, 3-орын иегерлері «ҚР спорт шебері» атағына ие болады. Сонымен қатар, жеңімпаздар алдағы әлемдік жарыстарда ел намысын қорғайды.

Ақтаудағы дүбірлі дода 25-27 ақпан аралығында 33 шағынаудандағы «Маңғыстау Арена» спорт кешенінде өтеді.

Айта кетейік, Азия чемпионаты 2025 жылдың сәуір айында Ташкентте, ал Әлем чемпионаты қарашада Ашхабад қаласында өтеді.

Маңғыстау облысы әкімінің баспасөз қызметі

• 03.03.2025
• 25