Нұрдәулет Қилыбай: Биыл өңірдегі ветеринария саласын жақсартуға қаржылай қолдау көрсетіледі

Бүгін, 1 наурыз күні Маңғыстау облысында алғаш рет мал ауруларын емдеу жолдары туралы ғылыми кітап жарық көрді. 50 жылдан бері мал дәрігері болып қызмет атқарып келе жатқан тәжірибелі ветеринар Қаржаубай Көшеннің «Мал аурулары және емдеу жолдары» атты кітабының тұсаукесері өтті.

Шараға Маңғыстау облысының әкімі Нұрдәулет Қилыбай, мал шаруашылығы саласының ардагерлері мен шаруа қожалықтарының иелері, ауыл әкімдері
қатысты.

Жиында сөз алған облыс әкімі Нұрдаулет Қилыбай көктемнің алғашқы күнінде мерейлі 70 жасқа толған кітап авторына еселі еңбегі үшін алғыс айтып, ветеринария саласына қосқан үлесі үшін арнайы төсбелгі тақты.

Сондай-ақ аймақ басшысы биыл бюджеттің басым бағыты әлеуметтік саламен қатар, мал шаруашылығына, ветеринария саласын жақсартуға бөлінгенін айтты.

-Мал дәрігері мамандығының мәртебесін көтеруіміз керек. Осы бағытта алға қойған жоспарларымыз да бар. Биыл өңірдегі ветеринария саласына жергілік бюджеттен 2,4 млрд теңге қаражат бөлінді. Оның 1,3 млрд теңгесі аудандық ветеринария саласының ғимараттары мен тұрмыс-тіршілігін жақсартуға бағытталады. Сонымен бірге ветеринария саласының мамандарына 45 көлік алу үшін де қаржы қарастырылды. Саланың жағдайын жақсарту ісі - алға қойған басым бағыттарымыздың бірі.
Қаржаубай Бисенұлының бүгін тұсауы кесілген еңбегі – еліміздің ауыл шаруашылығы саласына қосқан сүбелі үлесі деп білемін. Ағамыз алыстағы аядай ғана ауылда тұрып, ветеринария ғылымына үлкен жаңалық енгізді. Мал шаруашылығымен айналысушы азаматтарға таптырмас құнды дүние боларына сенімдімін,- деді Нұрдәулет Қилыбай.

Саналы ғұмырын мал емдеу ісіне арнаған Қаржаубай Көшен кітабында өзінің көп жылдық тәжірибесімен бөлісіп, пайдалы мағлұматтар келтірген.

Кітап тілі қарапайым, оқуға жеңіл, мал шаруашылығымен айналысатын кәсіпкерлер мен шаруаларға және ауылдың ветеринария саласы мамандарына қажетті көмекші құрал есебінде пайдалануға арналған.

Маңғыстау облысы әкімінің баспасөз қызметі

• 03.03.2025
• 25