Нұрдәулет Қилыбай: Статистика үшін жұмыс жасауды қойыңыздар

4 наурыз күні облыс әкімі Нұрдәулет Қилыбайдың төрағалығымен өткен аппараттық жиында Маңғыстау облысының кәсіпкерлік және сауда басқармасының 2024 жылы атқарған жұмыстары қорытындыланып, алдағы қысқа және ұзақ мерзімді жоспарлары талқыланды.

Жиында басқарма басшысы Дастан Мұраталиев өңірдегі шағын және орта бизнесті қолдау мақсатында 2024 жылы республикалық және жергілікті бюджеттен бөлінген қаражат есебінен 1 162 жоба субсидиялау құралы арқылы қолдау тапқанын мәлімдеді. Ал 2025 жылы бұл көрсеткіш 1 905 жобаға дейін артады деп жоспарлануда.

Сонымен қатар, әлеуметтік кәсіпкерлер мен «Бір ауыл – бір өнім» бағдарламасының финалистеріне мемлекеттік гранттар беру үшін жергілікті бюджеттен қаржы бөлініп, қараша айында конкурстық рәсімдер өткізілген. Нәтижесінде 20 кәсіпкердің жобасы мақұлданып, 50 жаңа жұмыс орны құрылды.

Басқарма басшысы Дастан Мұраталиевтың айтуынша, өңірдегі азық-түлік бағасын тұрақтандыру мақсатында «Халық бақылауы» мониторингтік топтарының жұмысы жалғасуда. Қазіргі таңда 53 бақылау тобы сауда орындарындағы әлеуметтік маңызы бар азық-түлік тауарларына (ӘМАТ) тұрақты мониторинг жүргізіп, заңға сәйкес 15%-дан жоғары үстемеақыға жол бермеу бойынша түсіндіру жұмыстарын жүргізуде.

-Жыл басынан бері делдалдық схемаларды тергеу жөніндегі өңірлік комиссия 12 отырыс өткізіп, заң бұзушылықтарға қатысты шаралар қабылдады. Нәтижесінде 31 кәсіпкерлік субъектіге әкімшілік хаттама толтырылып, 5 кәсіпкерге айыппұл салынды және 26 кәсіпкерге ескерту жасалды,-деді басқарма басшысы.

Жиында өңір басшысы азық-түлік бағасын бақылау жұмыстарының мардымсыз екенін сынға алып, оны күшейтуді тапсырды.

– Статистика үшін жұмыс жасауды қойыңыздар. Басты мақсат – азық-түлік бағасын тұрақтандыру болуы тиіс. Мониторинг топтары нақты нәтижеге жұмыс істеп, кәсіпкерлердің негізсіз баға өсіруіне қалайда жол бермеуі қажет, – деді Нұрдәулет Қилыбай.

Маңғыстау облысы әкімінің баспасөз қызметі

• 04.03.2025
• 33