Маңғыстау облысының әкімі азаматтарды жеке мәселелері бойынша қабылдады

6 наурыз күні Маңғыстау облысының әкімі Нұрдәулет Қилыбай облыс тұрғындарына жеке мәселелері бойынша қабылдау өткізді. Кездесу барысында азаматтар көші-қон, жұмыспен қамту, әлеуметтік қамтамасыз ету, инфрақұрылым және денсаулық сақтау салаларына қатысты сұрақтарын қойды.

Жұмыспен қамту мәселесі бойынша бірнеше тұрғын өтініш білдірді. Оның ішінде, мұнай компаниясынан жұмыс сұраған қарақиялық мүгедектігі бар азаматқа тұрақты жұмыс ұсынылды, алайда ол бұл қызметтерден бас тартты.

Сондай-ақ, Батыр ауылының тұрғыны жаз мезгілінде ауызсу тапшылығы болатынын, қоқыс тек аптасына бір рет шығарылатынын айтты. Сонымен қатар, қоғамдық көліктің ауыл ішімен қосымша бағытта жүру қажеттігін көтерді. Бұл мәселелерді шешу үшін аудан әкімдігіне жағдайды зерттеп, тиісті шараларды қабылдау тапсырылды.

Қабылдау барысында тұрғындар денсаулық сақтау жүйесіне қатысты да шағымдарын жеткізді. Ақтаулық ата-ана 4 жасар қызының өліміне әкеліп соққан мән жайларды зерттеп, әділ тергеу жүргізуді сұрады. Жауапты органдар сот-медициналық сараптама тағайындалғанын және оның нәтижесі наурыз айының соңында шығатынын мәлімдеді. Өңір басшысы істің бақылауда екенін және тергеу заң аясында әділ жүргізілетінін айтты.

Аймақ басшысы Нұрдәулет Қилыбай қабылдау барысында көтерілген барлық мәселелерді тиісті мемлекеттік органдар мен жауапты басқарма басшыларына жіті бақылауға алып, заң аясында шешу бойынша нақты тапсырмалар берді.

Маңғыстау облысы әкімінің баспасөз қызметі

• 07.03.2025
• 57