Маңғыстау облысы әкімінің 8 наурыз Халықаралық әйелдер күнімен құттықтауы

Ардақты аналар, ақ жаулықты әжелер мен аяулы апа, қарындастар!

​Сіздерді мейірімділік пен ізгіліктің, сұлулық пен жылулықтың мейрамы 8 наурыз халықаралық әйелдер күнімен шын жүректен құттықтаймын!

​Әлемдегі әсемдік пен сұлулық та, бойымыздағы ізгілік пен құт-береке ананың жүрегінен бастау алады. Әйел – рухани бастау ғана емес, әйел ертеңге деген сенім мен қажымас қайраттың қайнар бұлағы.

​Біздің ата-бабаларымыз қыз баласын тіршіліктің тұтқасы, ұлттық дәстүр мен салт-сананы, тарих пен тілді сақтап, қадірін ұрпақтың бойына дарытушы деп қастерлеген халық.

​Мемлекет басшысы Қасым-Жомарт Тоқаев «Сіздер әлемге жылулық пен жарасым сыйлап, жақын жандарыңызды махаббатқа бөлейсіздер. Аяулы аналарымыз өскелең ұрпақтың бойына адамгершілік құндылықтарды сіңіріп, оларды еңбекқор, білімпаз болуға тәрбиелейді. Бүгінде әйелдер қауымының отбасындағы, қоғам өміріндегі және мемлекетті жан-жақты дамыту ісіндегі рөлі орасан зор»,- деп атап өткен болатын.

​Бүгінде дамыған қоғамның қай саласында да нәзік жандылардың қолтаңбасы бар. Олар тек асыл жар, қамқор ана, сенімді дос қана емес өндірісте, шығармашылық жолында, саясат, бизнес және басқа да көптеген салада биік белестерді бағындырып келеді.

Ел өмірінің саяси, әлеуметтік-экономикалық дамуына орасан зор үлес қосып жүрген қыз-келіншектеріміздің ерен еңбектерінің жемісі молая берсін!

​Қадірлі аналар, арулар!

​Сіздерге дүниенің бар жақсылығын, қуанышы мен шаттығын, деннің саулығы мен көңілдің шуағын тілеймін! Шаңырақтарыңызға шаттық орнап, әулеттеріңізде тек амандық болсын!

Құрметпен, Маңғыстау облысының әкімі Нұрдәулет Қилыбай

• 11.03.2025
• 20