Форт-Шевченко қаласында өнер мектебінің жаңа ғимараты ашылды

Бүгін, Амал мерекесі қарсаңында Түпқараған ауданы, Форт-Шевченко қаласында Мұрын жырау Сеңгірбекұлы атындағы жаңа аудандық өнер мектебі ашылды. Өнер бе­сігінің ашылу салтанатына Маңғыстау облысының әкімі Нұрдәулет Қилыбай, Қазақстанның еңбек сіңірген қайраткері, белгілі күйші Сержан Шәкірат, құрметті профессор,Маңғыстау өнер колледжінің оқытушысы Аманбек Сүндетов және ата-аналар мен оқушылар, аудан тұрғындары қатысты.

Салтанатты шарада аймақ басшысы тұрғындарды жаңа балалар өнер мектебінің ашылуымен құттықтап, ізгі тілегін жеткізді.

- Мемлекет басшысы әрдайым Маңғыстау өңіріне ерекше көңіл бөледі. Мәдениет – аясы кең ұғым. Бүгінгі жастардың бәсекеге қабілетті болып, елдің алдыңғы қатарынан көрінуі үшін, ең алдымен, мәдениетті үйрету керек. Ал жас ұрпаққа үлгі көрсету – біздің міндетіміз. Бүгін ашылған жаңа өнер мектебі жас таланттарды тәрбиелеп, олардың шығармашылық қабілеттерін шыңдайтын маңызды орталыққа айналарына сенемін. Бұл мектептен шыққан шәкірттер болашақта еліміздің ғана емес, әлемнің түкпір-түкпірінде танымал болсын! – деді Нұрдәулет Қилыбай.

Заманауи өнер ордасы домбыра, қобыз, баян, фортепиано, ән-терме, вокал, би, бейнелеу өнері, қолөнер, тоғызқұмалақ, дойбы, драма және хор үйірмелері бойынша 1500-ге жуық оқушыны өнерге баулып отыр. Жаңа нысанда 400 орындықты көрермен залы бар.

Балалар­дың бо­йындағы қабілетін шыңдау мақ­сатында тұсауын кескен мек­тепке оқушылар 7-8 жастан бастап қабылданады. Оқушылар хареография сыныптарында 7 жыл, домбыра үйірмесінде 5 жыл білім алып, арнайы куәлік алады.

Жаңа өнер ордасының ашылу салтанаты аясында Қазақстан Жазушылар одағының мүшесі, журналист, Түпқараған ауданының Құрметті азаматы, бірнеше кітаптың авторы Айсағали Қыдырдың «Маңғыстаудағы алғашқы АВТО шаруашылық» атты кітабының тұсауы кесілді.

Бұл еңбек 1957 жылы колонна ретінде құрылып, уақыт өте автобазаға айналған, кейіннен іргелі кәсіпорынға өсіп-жетілген Форт-Шевченко 1804 автокөлік кәсіпорнының тарихы мен еңбек ұжымына арналған.

Маңғыстау облысы әкімінің баспасөз қызметі

• 12.03.2025
• 40