Нұрдәулет Қилыбай лудоманиямен күресуге қатысты бірқатар тапсырма берді

Бүгін, 13 наурыз күні облыс әкімі Нұрдәулет Қилыбайдың төрағалығымен экономикалық құқық бұзушылықтардың алдын алу және оның профилактикасы жөнінде жиын өтті. Басқосуда өңір басшысы лудоманияға қарсы күрес жүргізу үшін мектеп бағдарламасына жаңа пән енгізу, анонимді Call-орталық ашу сынды бірқатар тапсырма берді. Жиын әлеуметтік желілерде тікелей эфирден көрсетіліп, тұрғындар аталған мәселеге қатысты сауалдарын қоюға мүмкіндік алды.

Экономикалық тергеп-тексеру департаментінің бастығы Айдын Молдабеков өз баяндамасында заңсыз ақша айналымы, бюджет қаражатын жымқыру, контрабанда, заңсыз ойын бизнесі, қаржылық пирамидалар құру және лудоманияның алдын алу мәселесі бойынша жүргізіліп жатқан жұмыстар туралы айтты.

- Қаржы пирамидалары мен заңсыз ойын бизнесінің қарқынды дамуы халықтың қаржылық сауаттылығының төмендігімен байланысты. 2022-2025 жылдар аралығында қаржылық пирамида ұйымдастыру және басқару бойынша 12 қылмыстық іс қозғалып, кінәлі тұлғалар жауапкершілікке тартылды. Ақтау және Жаңаөзен қалаларында 28 жасырын ойын залының қызметі тоқтатылды. Барлық қылмыстық істер сотқа жолданып, заңсыз ойын автоматтары жойылды, кінәлілер сотталды, - деді Айдын Молдабеков.

Облыс прокуроры Айдос Майлыбаев Айдын Молдабековке алдағы уақытта лудоманиямен күрес жүргізу үшін мемлекеттік гранттарды игеріп отырған үкіметтік емес ұйымдардың жұмысына да тексеру жүргізуін сұрады.

Ал, облыстық цифрлық технологиялар басқармасының басшысы Құдайберген Алмағамбетов өз баяндамасында әлеуметтік желілер мен цифрлық технологиялар арқылы қаржылық пирамидалар мен лудоманияны насихаттаудың жаңа әдістеріне тоқталып, олармен күресу жолдарын ұсынды. Атап айтқанда, қаржылық сауаттылықты арттыруға бағытталған білім беру бағдарламаларын әзірлеу, әлеуметтік желілер мен жарнама алгоритмдеріндегі зиянды контентті анықтау және бұғаттау шараларын күшейту, сандық қауіпсіздік технологияларын дамыту.

Жиында облыс әкімі Нұрдәулет Қилыбай лудоманияның қоғам мен мемлекет үшін қауіпті екенін атап өтіп, онымен күресу мақсатында тиісті мемлекеттік органдар мен басқармаларға тапсырма жүктеді.

- Бүгін біз бұл мәселенің шешу жолдарын бірлесе талқылау үшін жиналдық. Лудомания – қоғам мен мемлекет үшін өте қауіпті. Тез әрекет етуіміз керек. Ол үшін кешенді жұмыс атқарылуы тиіс. Білім басқармасы тиісті басқармалар мен мамандарды, қоғамдық ұйым өкілдерін жұмылдыра отырып, келесі оқу жылынан бастап мектеп бағдарламасына лудоманияның алдын алу сабағын енгізу қажет. Сонымен қатар, анонимді Call-орталық ашып, тұрғындардың өз мәселелерін жасырын айтуларына және қажетті кеңес алуларына мүмкіндік жасауымыз керек. Бұл орталыққа халықтан заңсыз жұмыс істеп тұрған құмар ойындар туралы мәліметтерді де берулерін сұраймыз,- деді Нұрдәулет Қилыбай.

Жиын соңында аймақ басшысы жергілікті кәсіпкерлердің ұсынысы негізінде Маңғыстауда лудоманияны емдейтін арнайы орталық ашуды қарастыруды және құқық қорғау органдарының басшыларына лудомания мәселесін кешенді түрде бірлесіп шешу жөнінде бірқатар тапсырмалар берді.

Маңғыстау облысы әкімінің баспасөз қызметі

• 14.03.2025
• 21