Маңғыстау облысы әкімінің Амал мерекесіне арналған құттықтауы

Ардақты ағайын!

Түп-тамыры тереңге тартқан халқымыздың ең ерекше дәстүрлі мерекелерінің бірі – Амал мейрамы құтты болсын!

Бұл шуақты күн -  еңсесі биік елдіктің, іргесі берік бірліктің, ырыс пен ынтымақтың мерекесі.

Амал – халқымыздың бір-бірімен көрісіп, кешірім мен мейірімге бөленетін ерекше күн. Адамзат үшін де бұл күн – жүректегі жылы лебізді білдіріп, бауырмалдықты арттыратын, өткенге салауат айтып, болашаққа нық қадам басатын кезең.

Былтырдан бастап Мемлекет басшысы Қасым-Жомарт Кемелұлы Тоқаевтың бастамасымен Наурыз мейрамын тойлаудың жаңа форматы – Наурызнама онкүндігі бекітілді. Ұлтымыздың ұлттық мейрамын тойлаудың онкүндігі – 14 наурыз – Көрісу күнінен басталады.
Осылайша Президент «Амал» мерекесінің маңыздылығына мән беріп, елдік пен ынтымаққа шақыратын осы мейрамның ұлтымыздың бауырмалдық салтының жарқын көрінісі екенін атап өтті.

Жыл өткен сайын Амал мерекесі елімізді мекендеген бүкіл халықтың, ұлт пен ұлыстың сағынып күтетін ортақ мерекесіне айналып, ерекше мәнге ие болуда.

Қымбатты жерлестер!

Жаңа айдың туылуымен келген Амал мерекесі әр шаңыраққа бақыт пен шаттық, ырыс пен береке әкелсін. Еліміз аман, жұртымыз тыныш, әрдайым еңсеміз биік болсын!

Амалдан амалға аман-есен жете берейік. Жыл құтты болсын, ағайын!

Құрметпен,
Маңғыстау облысының әкімі Нұрдәулет Қилыбай

• 14.03.2025
• 45