Нұрдәулет Қилыбай отырып ойнау волейболынан өткен Қазақстан чемпионатының жеңімпаздарын марапаттады

13-15 наурыз күндері Жаңаөзен қаласында отырып ойнау волейболынан екі ірі спорттық шара өтті. Алғашқысы ардагерлер арасындағы Қазақстан чемпионаты болса, екіншісі «Біз бірдейміз, кемсітуді білмейміз» атты инклюзивті спорт жарысы. 

Бүгін аталған жарыстардың жабылу салтанатты өтті. Паралимпиадалық спорт орталығында өткен шараға Маңғыстау облысының әкімі, облыстық паралимпиада федерациясының құрметті президенті Нұрдәулет Қилыбай мен спорт ардагерлері қатысты.

Қазақстан чемпионатына Астана, Ақтөбе, Қызылорда және Маңғыстау облысының спортшылары қатысты. Жарыс қорытындысы бойынша бірінші орынды Маңғыстау командасы жеңіп алып, чемпион атанды. Екінші орынды Ақтөбе құрамасы алса, жүлделі үшінші орын Қызылорда командасына бұйырды. Астана қаласының командасы үздік төрттікті түйіндеді.  

Сондай-ақ, «Біз бірдейміз, кемсітуді білмейміз» атты отырып ойнау волейболынан арнайы жарыс өтті. Оған «ӨзенМұнайГаз» командасы, қала әкімдігі, Жаңаөзен қалалық мәслихатының депутаттары және «Алға» спорт клубы қатысты.  

Инклюзия мен тең мүмкіндіктерді дәріптейтін жарыстың қорытындысы бойынша «ӨзенМұнайГаз» АҚ командасы мен Жаңаөзен қаласының мәслихаты депутаттарының құрамасы үшінші және төртінші орындарды өзара бөлісті. Ал финалда қала әкімі бастаған қала әкімдігінің командасы мен «Алға» спорт клубы кездесіп, тартысты ойын нәтижесінде «Алға» спорт клубы жеңімпаз атанды. 

 Аймақ басшысы осындай спорттық шаралар арқылы қоғамдағы инклюзияны дамытуға, мүмкіндігі шектеулі жандарды қолдауға және ардагер спортшылардың тәжірибесін жастарға насихаттауға мүмкіндік беретінін айтты. 

- Бұл чемпионаттар тек спорттық дода ғана емес, ерекше қажеттіліктері бар жандардың қоғамға толыққанды араласуына мүмкіндік беретін маңызды алаң болды. Турнирлер мүмкіндігі шектеулі жандардың спортқа деген қызығушылығын арттырып қана қоймай, қоғамда инклюзивті мәдениетті қалыптастыруға үлес қосады. Сіздер нағыз батырсыздар, -деді Нұрдәулет Қилыбай. 

Жарыс соңында жеңімпаздар арнайы сыйлықтармен марапатталды.

• 17.03.2025
• 20