Су ресурстары және ирригация министрлігінің бастамасымен «Су үнемде - болашақты сақта» атты ауқымды жобаны басталды.

Қоғамда су үнемдеу мәдениетін дамытуға бағыталған жоба аясында бір мезетте Астананың 111 мектебінде сынып сағаттары өтті. 200 мыңға жуық оқушы еліміздің су ресурстары және оны үнемдеудің маңызы туралы ақпаратпен танысты. Балалар суды тиімді пайдалану жөнінде өз ойларымен бөлісіп, оны сақтау тақырыбында сурет салды.

Мен Астанадағы №104 мектепте өткен ашық сабаққа қатысып, оқушыларға елімізде су ресурстарын үнемдеу және оны тиімді пайдалану бойынша атқарылып жатқан жұмыстар туралы айтып бердім. Мәселен, біздің министрлік 2024-2026 жылдарға арналған су үнемдеудің Жол картасын әзірледі. Құжат су заңнамасын жетілдіру, су саласын цифрландыру, суды есепке алу мен су үнемдеудің заманауи технологияларын енгізу жөніндегі іс-шараларды көздейді. Бұдан бөлек, тұрмыстық жағдайда су үнемдеу бойынша әдістемелік нұсқаулық әзірленді.

Одан кейін «ашық микрофон» форматында оқушылар мен мұғалімдердің сұрақтарына жауап бердім. Кездесуде су үнемдеу әдістері, өзен-көлдерді сақтау және су саласының мамандарын оқыту жөнінде сұрақтар қойылды.

Біз ең алдымен мектеп оқушыларынан бастауды жөн көрдік. Себебі, мектеп жақсы әдет пен дұрыс дағды үлгісін қалыптастыруға қолайлы орта болып табылады. Бұл жоба оқушылардың су ресурстарының маңызы туралы білімін арттыруға, жастардың экологиялық жауапкершілігін дамытып, қала мектептерінде су үнемдеу қозғалысын қалыптастыруға арналған.

Біз алдағы уақытта бұл жобаның ауқымын республика көлемінде одан әрі дамытып, барлық жастағы азаматтарды қамтуды жоспарлап отырмыз. Себебі су - ортақ байлық, бәріміз үшін қажет құнды ресурс. Оны үнемдеуге және сақтауға барлығымыз үлес қоса аламыз.

• 18.03.2025
• 24