ҚДБ стратегиялық жобалар үшін қаржыландыру тартуда: Banco Santander-мен келісімге қол қойылды

«Қазақстанның Даму Банкі» АҚ («Бәйтерек» холдингінің еншілес ұйымы, бұдан әрі – Банк, ҚДБ) және Испанияның ірі қаржы институты Banco Santander экспорттық қаржыландыру саласындағы ынтымақтастық туралы негіздемелік келісімге қол қойды. Құжат Мадридте өткен Қазақстан-Испания іскерлік кеңесінің 8-отырысы аясында рәсімделді. Келісім Қазақстанда инфрақұрылымдық және энергетикалық инвестициялық жобаларды жүзеге асыру үшін ұзақ мерзімді кредит тартуға бағытталған.

Келісім аясында Banco Santander экспорттық кредиттік агенттіктердің сақтандыруымен ҚДБ-ға 400 млн еуроға дейін қаржы ұсыну ниетін білдірді. Қаражат халықаралық экспорттаушылардың қатысуымен стратегиялық маңызды жобаларды қаржыландыруға бағытталады. Бұл қадам Қазақстанға озық технологияларды тартуға, инфрақұрылымды жаңғыртуға және халықаралық экономикалық байланыстарды нығайтуға мүмкіндік береді.

Халықаралық экспорттық қаржыландыруды тарту Қазақстанда ірі инвестициялық жобаларды жүзеге асыру үшін жаңа мүмкіндіктер ашады. Banco Santander-мен келісім – тұрақты экономикалық өсуді қамтамасыз етуге және озық технологияларды енгізуге мүмкіндік беретін қаржы құралдарын дамытудағы маңызды қадам. Біз стратегиялық инвесторлар мен халықаралық серіктестерді тарту бойынша белсенді жұмысымызды жалғастырамыз.

Сонымен қатар, Іскерлік кеңес барысында ҚДБ басшысы «Жаңа бизнес-мүмкіндіктер» тақырыбындағы панельдік сессияда сөз сөйлеп, Қазақстанның инвестициялық әлеуеті мен ҚДБ-ның ірі жобаларды қаржыландырудағы рөлін таныстырды. Қазақстандық делегация құрамында Xcalibur, Barceló Hotel Group Ávoris сияқты жетекші испандық компаниялардың өкілдерімен келіссөздер жүргізіліп, Parque Tecnológico de Valdemingómez және Innovaciones Imabe S.L.U. кәсіпорындарына сапар ұйымдастырылды.

Banco Santander-мен келісімге қол қою және жүргізілген кездесулер халықаралық ынтымақтастықты кеңейтуге, шетелдік инвестицияларды тартуға және Қазақстан экономикасының негізгі салаларына озық технологияларды енгізуге ықпал етеді. Бұл қазақстандық бизнес үшін жаңа мүмкіндіктер ашып, елдің тұрақты дамуына септігін тигізеді.

• 19.03.2025
• 50