Нұрдәулет Қилыбай облыс прокуратурасының алқа отырысына қатысты

27 наурыз күні Маңғыстау облысының әкімі Нұрдәулет Қилыбайдың қатысуымен облыс прокуратурасының алқа отырысы өтті. Облыс прокуроры Айдос Майлыбаевтың төрағалығымен өткен жиында білім беру ұйымдарының қызметіне жүргізілген тексерулердің қорытындылары қаралып, білім сапасын арттыру мәселелері талқыланды.

Облыстық прокурордың бірінші орынбасары Жандос Бердіқұлов білім беру мекемелерінің қызметін тексеру нәтижелері туралы баяндама жасады. Сонымен қатар, облыстық Білім басқармасы басшысының міндетін атқарушы Гүлбану Қызылғұлова да саладағы өзекті мәселелерді атап өтті.

Бүгінде өңірдегі білім беру ұйымдарында 23 337 педагог қызмет атқарады. Алайда, білім сапасын арттыруға кедергі келтіретін бірқатар факторлар анықталған. 2024 жылы облыстағы 20 мыңнан астам педагогтің дипломына тексеріс жүргізіліп, 67 мұғалімнің жалған құжатпен жұмыс істегені белгілі болды. Олар қызметінен босатылды.

Білім сапасы бойынша өңірдің көрсеткіштері республикалық деңгейден төмен сапа көрсетіп тұр. Атап айтқанда, МОДО (ББЖМ – білім беру жетістіктерін мониторингілеу) көрсеткіші бойынша Алматы қаласынан 9%-ға төмен, ҰБТ нәтижелері республикалық көрсеткіштен 10%-ға төмен. Сондай-ақ, PISA халықаралық зерттеуінің оқу сауаттылығы бойынша көрсеткіші 71,7 ұпайды құрап, шекті деңгейден төмен болды.

Осыған байланысты, Маңғыстау облысының әкімдігі ҚР Оқу-ағарту министрлігімен бірлесіп, 2023-2029 жылдарға арналған білім беру жүйесін дамыту жөніндегі аймақтық жол картасын бекітті. Аталған құжат аясында білім беру сапасын жақсарту, педагогтердің біліктілігін арттыру және сыбайлас жемқорлықтың алдын алу шаралары жүйелі түрде жүзеге асырылуда.

Облыс әкімі Нұрдәулет Қилыбай білім беру сапасының өңірдегі өзекті мәселе екенін атап өтіп, педагогтердің біліктілігін арттыру, білім беру жүйесін жетілдіру және сапаны жақсарту бойынша нақты шараларды жүзеге асыруда жауапты мекемелермен бірлесіп жұмыс жүргізілу керектігін жеткізді.

Маңғыстау облысы әкімінің баспасөз қызметі

• 28.03.2025
• 11