Маңғыстау облысында сыбайлас жемқорлыққа қарсы іс-қимыл мәселелері талқыланды

28 наурызда Маңғыстау облысының әкімі Нұрдәулет Қилыбайдың төрағалығымен сыбайлас жемқорлыққа қарсы іс-қимыл мәселелері жөніндегі комиссия отырысы өтті. Күн тәртібінді облыстық дене шынықтыру және спорт басқармасы мен жұмыспен қамтуды үйлестіру және әлеуметтік бағдарламалар басқармасына жүргізілген сыртқы талдау қорытындылары қаралды.
Комиссия отырысында ҚР Сыбайлас жемқорлыққа қарсы іс-қимыл агенттігінің Маңғыстау облысы бойынша департаменті басшысының бірінші орынбасарының міндетін атқарушы Әли Абдулов баяндама жасап, өңірдегі сыбайлас жемқорлық тәуекелдеріне қатысты бірқатар өзекті мәселелерді атап өтті.

Өткен жылы сыбайлас жемқорлыққа қарсы қызмет Туризм және спорт министрлігімен бірлесіп, спортты қаржыландыру саласындағы жемқорлық тәуекелдеріне сыртқы талдау нәтижесінде жүйелі жемқорлық спорт саласының дамуына кедергі келтіріп отырғаны анықталды.

Әли Абдуловтың айтуынша, спорт басқармасына бағынысты кейбір ұйымдардың жаттықтырушылары жалған дипломмен жұмыс істегені анықталып, олардың еңбек шарттары біржақты негізде бұзылды. Сонымен қатар, мемлекеттік спорттық тапсырысқа жатпайтын спорт секциялары үшін негізсіз қаржы төленгені белгілі болды.
Отырыста 2024 жылдың 1-тоқсанында жүргізілген талдау нәтижесінде әлеуметтік қамсыздандыру жүйесінде бірқатар жемқорлық тәуекелдері анықталғаны мәлім болды.
Осы мәселелер негізінде жауапты тұлғаларға тәртіптік шаралар қолданылып, бюджетке келтірілген шығындар қайтарылды .

Облыс әкімі Нұрдәулет Қилыбай бюджет қаражатын пайдалану кезінде ашықтықты қамтамасыз етіп, халықтың осал топтарының мүдделерін қорғауға баса назар аудару керектігін айтты.

Маңғыстау облысы әкімінің баспасөз қызметі

• 31.03.2025
• 36