Маңғыстауда зорлық-зомбылықтан зардап шеккен әйелдерге көмек көрсететін екі дағдарыс орталығы жұмыс істейді

28 наурыз күні облыс әкімі Нұрдәулет Қилыбайдың төрағалығымен өткен құқық бұзушылық профилактикасы жөніндегі ведомствоаралық комиссияның отырысында тұрмыстық зорлық-зомбылықтың алдын алу, қоғамдық тәртіпті сақтау және меншікке қарсы қылмыстарға тосқауыл қою мәселелері қаралды. Жиын әлеуметтік желілерде тікелей эфирде көрсетілді.

Маңғыстау облысының полиция департаменті жергілікті полиция қызметінің бастығы Нұрсейт Оразов отырыс барысында отбасы-тұрмыстық қарым-қатынастардағы құқық бұзушылықтарды азайту мақсатында атқарылып жатқан жұмыстар жөнінде баяндама жасады. Оның айтуынша, былтыр 400-ден астам тұрмыстық құқық бұзушылық туралы хабарламалар қаралып, 135 тұлға әкімшілік жауапкершілікке тартылған. Бұған қоса, қазіргі таңда өңірде зорлық-зомбылықтан зардап шеккен әйелдерге көмек көрсету мақсатында екі дағдарыс орталығы жұмыс істеп тұр.

Жүргізілген талдау көрсеткендей, отбасылық жанжалдардың негізгі себептері – тұрақты табыс көзінің болмауы, маскүнемдікке салыну және құмар ойындарға тәуелділік. Сондай-ақ адамгершілік құндылықтардың төмендеуі де тұрмыстық зорлық-зомбылықтың артуына ықпал етуде.

Комиссия отырысында қоғамдық орындарда кальян шегуге қарсы күрес мәселесі де көтерілді. Полиция департаменті рейдтік іс-шараларды күшейтіп, кальян өнімін ұсынатын және тұтынатын тұлғаларды анықтау жұмыстарын жүйелі түрде жүргізуде. 2024 жылы бұл бағыттағы құқық бұзушылықтар бойынша 547 азамат әкімшілік жауапкершілікке тартылып, айыппұл салынған.

Сонымен қатар, Маңғыстау облысы полиция департаменті бастығының бірінші орынбасары Ілияс Жұмағұлов 2024-2026 жылдарға арналған ұрлықтарға қарсы іс-қимыл жөніндегі бағдарламаның жүзеге асырылу барысы туралы ақпарат берді.

Өңір басшысы Нұрдәулет Қилыбай комиссия отырысында талқыланған құқық бұзушылықтардың салдарымен емес, себебімен күресу маңызды екенін айтты. Қылмыстардың алдын алу үшін олардың себебін зерделеп, зерттеу жүргізуді тапсырды.

Маңғыстау облысы әкімінің баспасөз қызметі

• 31.03.2025
• 41