Маңғыстау облысында есірткіге қарсы күрес күшейтілуде

28 наурыз күні Маңғыстау облысының әкімі Нұрдәулет Қилыбайдың төрағалығымен нашақорлық пен есірткі бизнесіне қарсы іс-қимыл мәселелері жөніндегі ведомствоаралық штабтың отырысы өтті.

Облыстық полиция департаментінің мәліметінше, 2025 жылдың алғашқы үш айында өңірде 136 есірткіге қатысты құқықбұзушылық анықталды. Заңсыз есірткі айналымына қатысы бар 94 адам қылмыстық жауапкершілікке тартылды. Сонымен қатар, рейдтік шаралар барысында есірткі дүкендерін жарнамалайтын 240 граффити жазуы жойылып, әлеуметтік желілер мен Telegram мессенджеріндегі мониторинг нәтижесінде 263 сайттың қызметі бұғатталуға жіберілді.

Облыстық полиция департаментінің деректеріне сүйенсек, өткен жылы жастар арасындағы құқықбұзушылықтың 883 фактісі тіркелген.

Өңірде нашақорлықтың алдын алу мақсатында бірқатар бастамалар жүзеге асырылуда. Соның ішінде, синтетикалық есірткіге қарсы күресті күшейту мақсатында “Stop Synthetic Mangystau” Telegram бот-чаты іске қосылып, тұрғындарға есірткіге қатысты құқықбұзушылықтар туралы ақпаратты анонимді түрде жіберуге мүмкіндік берілді. Жастар ресурстық орталықтарының ұйымдастыруымен профилактикалық кездесулер мен қоғамдық рейдтер тұрақты түрде өткізілуде.

Есірткінің алдын алу бағытында жыл басынан бері 220 профилактикалық іс-шара ұйымдастырылды. Бұл ретте, Маңғыстау облыстық жастар саясаты басқармасының басшысы Мұқаш Оралбай өткен жылы атқарылған шараларға тоқталып, 2025 жылға жоспарланған жұмыстар жөнінде баяндама жасады.

Отырыста Маңғыстау облысының білім басқармасы басшысының міндетін атқарушы Гүлбану Қызылғұлова білім беру ұйымдарында есірткіге қарсы күрес бойынша жүргізіліп жатқан жұмыстар туралы айтып берді. 2023-2025 жылдарға арналған кешенді жоспар аясында полиция департаментімен бірлескен іс-шаралар қолға алынып, мектептер мен колледждерде семинарлар, дәрістер, дөңгелек үстелдер және ата-аналардың қатысуымен түрлі жиындар ұйымдастырылып келеді.

Сонымен қатар, оқушылар мен жастардың құқықтық сауаттылығын арттыру және олардың есірткіге тәуелділігінің алдын алу мақсатында “QR-профилактика” жобасы іске қосылды.
Гүлбану Қызылғұлова облыс бойынша наркологиялық диспансерде есепте тұрған оқушылардың жоқ екенін атап өтті.

Аймақ басшысы Нұрдәулет Қилыбай нашақорлыққа қарсы күрес бағытындағы шараларды одан әрі күшейту қажеттігін баса айтып, есірткінің алдын алу тек құқық қорғау органдарының ғана емес, бүкіл қоғамның ортақ міндеті екенін жеткізді.

Маңғыстау облысы әкімінің баспасөз қызметі

• 31.03.2025
• 47