Нұрдәулет Қилыбай Финляндия делегациясымен кездесті

Бүгін, 31 наурыз күні Маңғыстау облысының әкімі Нұрдәулет Қилыбай Финляндия Республикасының Қазақстандағы Төтенше және Өкілетті Елшісі Янне Хейсканен бастаған финляндиялық делегацияны қабылдады.

Кездесуге Финляндияның Сауда палатасы, Eastcham Finland ұйымының өкілдері, сондай-ақ энергетика, құрылыс, тау-кен өндірісі, логистика және туризм салаларында жұмыс істейтін жетекші компаниялардың өкілдері қатысты.

Басқосуда Янне Хейсканен Қазақстан мен Финляндия арасындағы экономикалық байланыстарды дамытуға мүдделі екендіктерін атап өтті. Ол финляндиялық компаниялар өңірде өз қызметін кеңейтуге, әртүрлі салалар бойынша ынтымақтастықты арттыруға дайын екенін жеткізді.

Өз кезегінде облыс әкімі Нұрдәулет Қилыбай финляндиялық әріптестермен бірлескен жобаларды жүзеге асыруға дайын екенін айтты.

- Наурыз айының ортасында Мемлекет басшысы Қасым-Жомарт Тоқаев пен Финляндия Республикасының Президенті Александр Стубб телефон арқылы сөйлесіп, екіжақты ынтымақтастықты одан әрі нығайту бойынша сұхбаттасқан еді. Біздің бүгінгі кездесуіміз – жаңа жобаларды табысты іске асыруға бағытталған ынтымақтастықтың жалғасы боларына сенеміз. Маңғыстау облысында Финляндия капиталының қатысуымен үш кәсіпорын жұмыс істейді. Өңіріміз үшін жаңа технологиялар, логистика, құрылыс және туризм салаларындағы әріптестікті дамыту маңызды. Сондықтан біз өзара тиімді әрі нәтижелі серіктестікке дайынбыз, – деді Нұрдәулет Қилыбай.

2024 жылдың қорытындысы бойынша Маңғыстау облысы мен Финляндия арасындағы сыртқы сауда айналымы 1 млн АҚШ долларын құрады. Импорт құрылымында өрт сөндіру машиналары, қара металдан жасалған бұйымдар, автоматты өрт сөндіру жүйелері, қозғалтқыш жабдықтары, құрылыс материалдары және шоколад өнімдері бар.

Маңғыстау облысы әкімінің баспасөз қызметі

• 31.03.2025
• 21