Маңғыстау облысы мен Финляндия елінің компаниялары арасында бірқатар келісім жасалды

Бүгін, 1 сәуір күні, Маңғыстау облысының әкімі Нұрдәулет Қилыбайдың қатысуымен маңғыстаулық және финляндиялық компаниялар арасында екіжақты ынтымақтастық туралы меморандумға қол қою рәсімі өтті.

Екіжақты кездесуде маңғыстаулық “ACTION FLOW” және финляндиялық “Econet Ltd” компаниялары арасында Маңғыстау облысында су тазарту жабдықтары мен технологияларын жергілікті өндіріс жағдайына бейімдеу, сондай-ақ сервис қызметтерін ұйымдастыру бойынша ынтымақтастық меморандумы бекітілді.

Сонымен қатар, “KazAzot PRIME” және “Econet Ltd” компаниялары арасында Аммиак-карбамид кешенін салу жобасы аясында су дайындау және тазарту жабдықтарын жеткізу жөнінде келісім жасалды.

Аймақ басшысы өңірдің экономикалық даму мүмкіндіктерін атап өтіп, сауда-экономикалық және туризм салаларында бірлескен жобаларды жүзеге асыруға ниетті екенін жеткізді.

- Маңғыстау облысының тұмса табиғаты туризмді дамытуға зор мүмкіндік береді. Өлкеде әлі де адам аяғы баспаған жерлер бар. Сонымен қатар, сауда мен экономиканы дамытуға үлкен әлеуетіміз бар. Сондықтан екі ел арасындағы серіктестікті нығайтып, нақты бағыттар бойынша жұмысты жандандыру қажет. Алдағы уақытта іске асатын жаңа жобалар өңір экономикасының дамуына тың серпін береді деп сенемін, – деді Нұрдәулет Қилыбай.

Өз кезегінде Финляндия Республикасының Қазақстандағы Төтенше және Өкілетті Елшісі Янне Хейсканен Маңғыстау өңірінің сұлу табиғаты мен халқының қонақжайлығына ризашылығын білдіріп, екіжақты ынтымақтастық аясында бірлескен жобаларды жүзеге асыруға қызығушылық танытып, мүдделі екенін жеткізді.

Маңғыстау облысы әкімінің баспасөз қызметі

• 02.04.2025
• 18