ҚДБ Маңғыстау облысында жел электр станциясының құрылысын қаржыландырады

«Қазақстанның Даму Банкі» АҚ Маңғыстау облысының Қарақия ауданында қуаты 50 МВт жел электр станциясын салу жөніндегі инвестициялық жобаны іске асыру үшін «Sarkylmas Kuat» ЖШС-мен кредиттік желі ашу туралы келісім жасасты.

Жоба China Export & Credit Insurance Corporation (Sinosure) сақтандыру өтемімен қаржыландырылады. ҚДБ үшін бұл осы халықаралық экспорттық компаниядан қамтылған алғашқы жоба.

ЖЭС құрылысы «таза» энергия өндіруді ұлғайту есебінен Маңғыстау облысында электр энергиясының тапшылығын қысқартуға бағытталған. Жоба дәстүрлі электр энергиясы көздеріне және импортқа тәуелділікті азайтуға көмектеседі.

«Банк экологиялық қағидаттарды ұстанады және тұрақты инвестициялық жобаларға белсенді қолдау көрсетеді. Жаңартылатын энергия көздеріне инвестициялар – Қазақстанның тұрақты дамуына қол жеткізу үшін маңызды бағыттар. Көміртегі шығарындыларын азайтумен қатар, жоба қазба энергия көздеріне және импортқа тәуелділікті азайтуға ықпал етеді», - деп атап өтті инфрақұрылымдық жобалар және банкаралық кредиттеу жөніндегі басқарушы директор Әсем Шәкенова.

Станция 2025 жылы пайдалануға берілгеннен кейін өндірілетін «жасыл» энергия көлемі жылына 182,9 млн кВт*сағ құрайды деп күтілуде. Бұл көмірқышқыл газының (CO₂) шығарындыларын жыл сайын 143 872 тоннаға азайтады, сонымен қатар пайдалану кезеңінде 12 тұрақты жұмыс орнын ашады.

• 04.04.2025
• 60