Сұлтан Раев: Ақтау – тарихи және мәдени мұраларға бай, Қазақстандағы рухани қаланың бірі

«Ақтау – Түркі әлемінің мәдени астанасы» жылының алғашқы күнінде халықаралық ТҮРКСОЙ ұйымының Бас хатшысы Сұлтан Раев этноқалашық «Дархан дала» аумағында ұсынылған нысандармен танысты.

Сұлтан Раевтың айтуынша, «Ақтаудың Түркі әлемінің мәдени астанасы» мәртебесін алуына байланысты 29 мәдени іс-шараны өткізу жоспарланған. Олар театр, кино, классикалық өнерден бастап, халықтық және бейнелеу өнеріне дейінгі кең ауқымды қамтиды. Бұл шаралардың ашылуына түркітілдес елдердің 1400-ге жуық мәдениет қайраткері қатысады.

«Олардың басым бөлігі – қазақстандық өнерпаздар, яғни би ұжымдары, халық аспаптар ансамбльдері. Сондай-ақ, шығыс елдерінен келген 400-ден астам әртіс өз өнерлерін паш етеді. Неге «Ақтау - Түркі әлемінің мәдени астанасы» болып таңдалды? Өйткені Ақтау – тарихи және мәдени мұраларға бай, Қазақстанның рухани орталықтарының бірі саналады. Қазақ халқының мәдениеті, тарихы, халық шығармашылығы осы өңірден бастау алады, әрі бұл құндылықтар қазіргі заманда әлемде ерекше бағаланады. Сонымен қатар, бұл қала Каспий теңізінің жағалауында орналасқан, ал Каспий бірнеше елді біріктіретін маңызды су айдыны. Осы себепті 2023 жылы «Ақтау - Түркі әлемінің мәдени астанасы» ретінде таңдалды», – деді ТҮРКСОЙ ұйымының Бас хатшысы Сұлтан Раев.

• 07.04.2025
• 19