Маңғыстау облысының әкімі Нұрдәулет Қилыбай халықты мерейтоймен құттықтады

Бүгін «Ақтау – Түркі әлемінің мәдени астанасы» жылының салтанатты ашылу шарасында Маңғыстау облысының әкімі Нұрдәулет Қилыбай жиналған тұрғындар мен қонақтарды мерейтоймен құттықтады.

*

Мәртебелі меймандар!
Қонағын құдайындай сыйлайтын елге қош келдіңіздер!

Қазақ даласы – түркі халықтарының ортақ қонысы. Біз төскейде малы, төрде басы қосылған қаны – бір, ары – бір, жаны – бір елміз. Бауырмыз.

Мемлекет басшысы Қасым-Жомарт Кемелұлы Тоқаев – түркі әлемін XXI ғасырда маңызды экономикалық және мәдени кеңістікке айналдыру – негізгі мақсат екенін айтқан болатын.

Бауырлас елдердің басшылары түркі жұртын біріктіруге баса мән беріп келеді. Бүгінгі кәрі Каспийдің жағасындағы ақмаржан – Ақтау шаһарында бас қосуымыз – осының дәлелі.

Түркі халықтарының қанына сіңген бір белгісі – мейманға жалғыз атын да сойып берер мәрттігі. Қазақ – қашаннан қонақжай халық. Даламыз қандай дархан болса – көңіл де сондай кең. Түбі бір түркі бауыр үшін Төріміз дайын. Қонақ қелсе қойы егіз қоздайтын халықпыз.

Ардақты ағайын!

Түркі дүниесіне еңбек сіңірген көрнекті мемлекет және қоғам қайраткері, осы топырақтың перзенті Әбіш аға Кекілбайұлының бір сөзін айтқым келеді:

«Маңғыстау – Тарих пен табиғаттың бірге толғаған тамаша дастаны, бірге салған таңғажайып суреті, бірге шерткен тағылымды шежіресі!» Ендеше, аңыздар мен абыздардың, әулиелер мен батырлардың елі – Маңғыстауға келіңіздер!, деді Нұрдәулет Қилыбай.

• 07.04.2025
• 21