Маңғыстаулық делегация ҚХА-ның «Бірлік пен келісім жолындағы 30 жыл» атты сессиясына қатысады

Бүгін, 11 сәуір күні Ақтау қаласында Маңғыстау облысының әкімі Нұрдәулет Қилыбайдың төрағалығымен облыстық Қазақстан халқы Ассамблеясы Кеңесінің отырысы өтті.

Жиынға облыстық мәслихат төрағасы Жаңбырбай Матаев, ҚХА Ақсақалдар кеңесінің төрағасы Оңайбек Әбділов, Маңғыстау аудандық Аналар кеңесінің жетекшісі, «Ассамблея жастары» республикалық қозғалысының аймақтағы өкілдері, Yessenov University ректоры, ҚХА Кеңесінің мүшелері, республикалық этномәдени бірлестіктердің жетекшілері қатысты.

Кеңес барысында «Қоғамдық келісім» мекемесінің директоры Амангүл Жайылханова Қазақстан халқы Ассамблеясының XXXIV сессиясына дайындық барысы туралы баяндама жасады. Оның айтуынша, кезекті сессия 2025 жылғы 23–24 сәуір күндері Астана қаласындағы Тәуелсіздік сарайында «Бірлік пен келісім жолындағы 30 жыл» тақырыбымен өтеді. Осы маңызды шараға Маңғыстау облысынан арнайы делегация қатысады.

Сонымен қатар, сессия аясында Қазақстан халқы Ассамблеясынан сайланған Парламент Сенатының депутаттарымен және облыстық депутаттық топ өкілдерімен кездесу ұйымдастырылады. Кездесуге өңірден 20 делегат қатысуы жоспарланып отыр.

Отырыста сөз сөйлеген аймақ басшысы Нұрдәулет Қилыбай Қазақстан халқы Ассамблеясының ел бірлігі мен қоғамдық тұрақтылықты сақтаудағы айрықша маңызын атап өтті.

- Мемлекет басшысы ҚХА сессиясында сөйлеген сөзінде келісім мен бірліктің – табысты мемлекеттің басты кепілі екенін нақты айтты. Қоғамдағы бейбітшілік пен тұрақтылық – еліміздің дамуы мен өркендеуінің берік негізі. Бұл құндылықтарды сақтау – баршамыздың ортақ міндетіміз. Осыған байланысты өңірімізде «Көпэтносты отбасы» байқауын ұйымдастыруды ұсынамын. Бұл бастама этносаралық татулықты нығайтып, өзара түсіністік пен құрмет мәдениетін қалыптастыруға ықпал етеді деген сенімдемін, – деді Нұрдәулет Қилыбай.

Жиын қорытындысында қатысушылар аталған ұсынысты бірауыздан қолдап, алдағы уақытта жүзеге асырылатын іс-шаралар бойынша талқылау жүргізді.

Маңғыстау облысы әкімінің баспасөз қызметі

• 14.04.2025
• 24