«Маңғыстау» теміржол вокзалында реконструкциялау жұмыстары басталды

Бүгін, 14 сәуір Мұнайлы ауданындағы «Маңғыстау» теміржол вокзалында реконструкциялау жұмыстары басталды. Ғимарат ұзақ уақыт жөндеуден өтпеген. Аталған құрылыс жұмыстары Мемлекет басшысының тапсырмасына сәйкес, туризм саласын жандандыру мақсатында инфрақұрылымдық нысандарды дамыту бағытында жасалып жатыр.

«Маңғыстау» теміржол вокзалы кешенінің жалпы ауданы 763 шаршы метрді құрайды. Нысан аумағын ұлғайту барысында ҚТЖ теңгеріміндегі 2 гектарға жуық жер телімі мемлекет меншігіне қайтарылып, қазіргі уақытта сүру жұмыстары жүргізілуде.

- Өңірімізде көп жылдан бері теміржол вокзалдарына күрделі жөндеу жұмыстары жүргізілмеді. Үкімет қолдауымен қазіргі уақытта өңірдегі теміржол вокзалының үшеуі, атап айтқанда «Маңғыстау», «Шетпе» және «Бейнеу» вокзалдарына күрделі жөндеу жұмыстары жүргізіледі. Әрбір кешен тиісті мердігер компанияларға міндеттелді. Бүгін, міне «Маңғыстау» теміржол вокзалын реконструкциялау басталды. Жобаны аяқтауға әзірге 150-ге жуық жұмысшы жұмылдырылды. 2025 жылдың соңына дейін жөндеу жұмыстарын аяқтау жоспарланған. ҚР Көлік министрлігінің мәліметінше, бүгін еліміздің барлық өңірінде 125 теміржол вокзалын қайта жаңғырту жұмыстары басталды. Маңғыстау облысындағы теміржол вокзалдарындағы жөндеу жұмыстары соның аясында жасалып жатыр, - деді Маңғыстау облыстық жолаушылар көлігі және автомобиль жолдары басқармасының басшысы Адайбек Қалиев.

Жоба барысында вокзалдардың ішкі және сыртқы келбетін толық жаңарту әрі сервистік инфрақұрылымын өзгерту көзделген. Бұл жөнінде Маңғыстау жүк тасымалы бөлімшесінің директоры Нәжімеден Губашов ақпаратпен бөлісті.

- Алғаш рет облысымызда теміржол вокзалы 1967 жылы ашылды. Кейін кішігірім жөндеу жұмыстары 1997 жылдары жүргізілді. Қазіргі уақытта күрделі жөндеу жұмысы басталды. Кешенді жаңғырту барысында бірқатар жұмыстар жүргізіледі. Атап айтсақ, кассалар, анықтама орны, дәретханалар - мүмкіндігі шектеулі жандар үшін қолжетімді болады. Сондай-ақ көтергіш құрылғылар, тактильді жолақтар, индукциялық панельдер орнатылып, арбалар жаңартылады. Жаңа кафе ашу, вендинг аппараттарын орнату, сақтау камераларын кеңейту, демалыс бөлмелері және ана мен бала бөлмелерін ұйымдастыру жоспарлануда. Күту залдары тегін Wi-Fi желісімен жабдықтау көзделген, - деді Нәжімеден Губашов.

Ғимаратқа күрделі жөндеу жұмысы басталғаны өңір тұрғындары мен қонақтарына қуанышты жаңалық болды. Тұрғындар ауқымды істің басы-қасында жүрген жұмысшы азаматтарға алғыстарын білдіруде. Маңғыстау теміржол саласының ардагері Табылды Әміров бұл бастамаға қуанышты екенін жеткізді.

- Қазіргі уақытта облысымыз күннен-күнге көркейіп келе жатыр. Туризм саласы да қарқынды дамуына байланысты, ҚТЖ толыққанды жөндеу жұмысын қажет етеді. Алдағы уақытта облысымызға келім-кетім қонақтар көп болады, осы себепті заман талабына сай жабдықталады деген сенімдемін. Мен құрылыс жұмысын бастап жатырған мекемеге табыс тілеймін. Межеленген уақытта бітіріп, халық иігіліне табысталады деген үміттемін. Іске сәт!,-деді Табылды Әміров.

Ескерте кетсек, реконструкциялау жұмысына байланысты «Маңғыстау» теміржол вокзалы уақытша жанындағы бос ғимаратқа ауыстырылды.

• 14.04.2025
• 25