Маңғыстау облысында «Таза Қазақстан» экологиялық акциясы аясындағы шаралар жалғасуда

«Таза Қазақстан» жалпыұлттық экологиялық акциясы аясында Ақтау қаласындағы Тобанияз Алниязұлы ескерткішінің аумағын көгалдандыру мақсатында тал көшеттері отырғызылды.
Іс-шараға мемлекеттік қызметшілер мен қала тұрғындары, «Green City Aktau» ЖШС қызметкерлері қатысты.

Экологиялық шараға қатысушылар биіктігі 3 метрді құрайтын «Черемуха» ағашының 50 түбін отырғызды. Сондай-ақ, ескерткіш аумағындағы жасыл-желектерді күтіп-баптау, түбін қопсыту және әктеу жұмыстарын жүргізді.

«Құс шие» ағашы (Черемуха) - биік жапырақты, кішкентай ақ хош иісті гүлдері мен жеуге жарамды жемістері бар бұта. Құс шие ағашының биіктігі 15-17 метрге жетеді. Ағаш қабығы, жапырақтары мен гүлдері ерекше иіс шығарады.Құс шие ағашының жемістері медицинада инфекциялық емес диареяға қарсы қайнатпа түрінде қолданылады.
Маңғыстау облыстық туризм басқармасының басшысы Ерсін Ибрашев қызметкерлерімен бірге сенбілікке белсене атсалысуда.

Бұл іс-шара тек экологиялық мәселелерді шешумен ғана шектелмей, қоғамдық сананы да көтеруге ықпал етеді. Бүгінгі тазалық жұмыстарының әсерінен жергілікті табиғатқа деген құрмет пен қамқорлық артады,- дейді Ерсін Ибрашев.

Сондай ақ, «Green City Aktau» ЖШС мекемесінің қызметкері Дәмекен Ерназарқызы «Таза Қазақстан» экологиялық акциясын қолдайды.

- Қоршаған ортаға деген жауапкершілік тек мемлекеттік немесе ұйымдық деңгейде ғана емес, әрбір азаматтың күнделікті іс-әрекетінде де көрініс табуы тиіс,- дейді Дәмекен Ерназарқызы.
Қызметкерлер мұндай шаралардың маңыздылығын атап өтіп, келешекте де белсенді қатысуға дайын екендерін білдірді. Мұндай экологиялық акциялар өңірдің экологиялық ахуалын жақсартуға әрі тұрғындардың табиғатқа деген сүйіспеншілігін арттыруға септігін тигізеді.

• 16.04.2025
• 30