Ақтауда өңірлік ғылымды дамытуға арналған көшпелі отырыс өтті

Бүгін, 25 сәуір күні Ақтау қаласында, «Қуатты өңірлік ғылым – қуатты өңір» тақырыбында
ҚР Президентінің жанындағы ҚР Ұлттық ғылым академиясы Президиумының көшпелі отырысы өтті.

Жиынға Маңғыстау облысының әкімі Нұрдәулет Қилыбай, ҚР Көлік министрі Марат Қарабаев, Ұлттық ғылым академиясының президенті Ақылбек Күрішбаев, ғылыми ұйымдардың басшылары, академиктер, елдің жетекші ғалымдары мен бизнес-қоғамдастық өкілдері қатысты.

Отырыста көлік логистикасын дамытуды ғылыми сүйемелдеудің өзекті мәселелері және ел экономикасының инновациялық дамуындағы өңірлік ғылымның рөлі мен оны дамыту жолдары талқыланды.

Облыс әкімі Нұрдәулет Қилыбай көшпелі отырыстың өңір үшін аса маңызды мәселелерді ғылыми тұрғыдан шешуге серпін беретінін атап өтті.

- Мемлекет басшысы Қасым-Жомарт Кемелұлы Тоқаев Маңғыстау облысына келген сапарында облыс экономикасын, оның өндірістік және логистикалық инфрақұрылымын дамытуға бағытталған ауқымды міндеттер қойды. Сол тапсырмаларды іске асырудың нақты қадамдарының бірі – бүгінгі отырыс. Расында да, Маңғыстау – барлық салада әлеуеті жоғары өңір. Бұл бағытта ғылым мен өндіріс арасындағы байланысты күшейтіп, нақты жобаларды жүзеге асыруға ниеттіміз. Бізде білімді де дарынды жастар бар. Қазіргідей жаңа технологиялардың дамыған заманында тек мұнайға сүйеніп отыруға болмайды. Тың салаларды дамытуға жастарды белсенді қатыстыру керек - деді Нұрдәулет Қилыбай.

Академия президенті Ақылбек Күрішбаев алғы сөзінде, Маңғыстау облысы даму бойынша зор әлеуеті бар еліміздің маңызды экономикалық өңірлерінің бірі екенін айтып, аймақтың дәстүрлі мұнай-газ секторынан басқа, энергетика, химия саласын, мал мен балық шаруашылықтарын және де туризмді дамытуға мол мүмкіндігі бар екенін жеткізді. Сондай ол ұлттық ғылым академиясы Маңғыстау облысы мен өңірлік ғылым және технологиялар кеңесіне жан-жақты қолдау көрсетуге дайын екендігін білдірді.

Отырыс барысында өңірлік ғылымның дамуының өзекті мәселелері, оның өңір мен елдің әлеуметтік-экономикалық дамуына ықпалы талқыланды. Қатысушылардың назарына жаңа зерттеулердің нәтижелері, ҚР-ның «Ғылым және технологиялық саясат туралы» қабылданған Заңы аясында өңірде қолданыстағы және болашақ өндірістердің дамуына қатысты технологиялық мәселелер мен проблемаларды шешу мүмкіндіктері ұсынылды. Сонымен қатар, қатысушылар өңір ерекшеліктеріне бейімделген ғылымды дамытудың жаңа басым бағыттарымен танысты.

Академия Президиуымы көшпелі отырысының қорытындысы бойынша көлік логистикасын дамыту және саланы ғылыми сүйемелдеу мәселелері бойынша аналитикалық жазба дайындалып, өңірлік ғылымды дамыту жөніндегі бірлескен жұмыс жоспары бекітіледі.

Көшпелі отырыс аясында ғылыми-инновациялық көрме ұйымдастырылып, Маңғыстау облысындағы өңірлік ғылымның басым бағыттарын айқындауға арналған форсайт-сессия өткізілді. «Ғылым-бизнес» питч-сессиясы форматында коммерцияландыруға дайын перспективалы ғылыми жобалар ұсынылды.

Маңғыстау облысы әкімінің баспасөз қызметі

• 25.04.2025
• 40