Су үнемдеу тақырыбындағы республикалық сурет байқауына 1000-нан астам жұмыс келіп түсті

Су ресурстары және ирригация министрлігінің бастамасымен және Оқу-ағарту министрлігіне қарасты Республикалық қосымша білім беру оқу-әдістемелік орталығының қолдауымен «Суды үнемде – болашақты сақта» тақырыбында екінші республикалық сурет байқауы басталды. Байқауға Қазақстанның түкпір-түкпірінен мектеп оқушылары қатысып жатыр.

Байқауға барлығы 1040 жұмыс қабылданды. Әсіресе бастауыш сынып оқушылары белсенділік танытып отыр. Жеңімпаздарды су және қоршаған ортаны қорғау саласындағы мамандар, сондай-ақ суретшілер мен дизайнерлерден құралған арнайы қазылар алқасы анықтайды.

«Министрлік жұмысының негізгі бағыттарының бірі – қоғамда су тұтыну мәдениетін қалыптастыру. Ол үшін су ресурстарының маңызын және оларды үнемдеу қажеттілігін өскелең ұрпаққа жеткізу қажет. Біз бұл байқауды екінші рет өткізіп отырмыз. Оқушылардың белсенділігі мен суды үнемдеу тақырыбына деген қызығушылығы көңіл қуантады»,

- деді Су ресурстары және ирригация министрі Нұржан Нұржігітов.

Естеріңізге сала кетейік, бұған дейін Нұржан Нұржігітов Астана қаласындағы №104 мектепте су үнемдеу тақырыбында ашық сабақ өткізген болатын. Сонымен қатар бір мезгілде елорданың 111 мектебінде сынып сағаттары өтті. Онда 200 мыңнан астам оқушы су ресурстарының маңызы және оларды қорғау туралы мағлұмат алды. Оқушылар суды үнемдеудің жолдарын талқылап, оған ұқыпты қарауға үндейтін плакаттар салды.

• 05.05.2025
• 13