ҚДБ Түркістан облысында күкірт қышқылы зауытының құрылысын қаржыландырады

«Қазақстанның Даму Банкі» АҚ («Бәйтерек» ұлттық холдингінің құрамына кіреді) және «Taiqonyr Qyshqyl Zauyty» ЖШС жобалық компания Түркістан облысының Тайқоңыр ауылында қуаты жылына 800 мың тонна өнім өндіретін күкірт қышқылы зауытын салу жөніндегі инвестициялық жобаны іске асыруға кредиттік желі ашу туралы келісімге қол қойды.

Жобаның жалпы құны – 113 млрд теңге. Жоба аясында толық циклді технологиялар, жабдықтар мен инжинирингтік қызметтерді ұсынатын италиялық Ballestra компаниясы технологиялық серіктес ретінде тартылған.

Зауыт Түркістан облысы Созақ ауданы Тайқоңыр ауылындағы уран кеніштеріне жақын орналасады. Бұл күкірт қышқылы – уран өндіруде қолданылатын ұңғымалық сілтісіздендіру технологиясы үшін негізгі реагент – логистикасын оңтайландыруға мүмкіндік береді. Өнімнің негізгі тұтынушысы – «Қазатомөнеркәсіп» ҰАК» АҚ.

Жобаның мақсаты – күкірт қышқылына деген импортқа тәуелділікті азайту, Қазақстанның уран саласын тұрақты жабдықтау, өнеркәсіптік қауіпсіздікті арттыру, ілеспе өндірістерді ынталандыру және жаңа жұмыс орындарын құру. Құрылыс кезеңінде 500-ге дейін адам, ал жоба іске қосылғаннан кейін 274 маман тұрақты жұмыспен қамтылады. Сондай-ақ бұл жоба өңірлік инфрақұрылымды дамытуға және әлеуметтік тұрақтылықты нығайтуға ықпал етеді.

Зауыт құрылысын аяқтау 2027 жылдың бірінші тоқсанына жоспарланған.

Өз қызметі аясында ҚДБ қайта өңдеу өнеркәсібі, инфрақұрылым және туризм салаларындағы ірі жобаларды қаржыландыру мандатына сәйкес жұмыс істейді. Банк мемлекеттік инвестициялық саясатты және өнеркәсіпті мемлекеттік ынталандыруды жүзеге асыруға уәкілетті ұлттық даму институты болып табылады.

• 13.05.2025
• 52