Оңдасын Оразалин ақтөбелік әйелдерді мерекелерімен құттықтады

Халықаралық әйелдер мерекесіне арналған «Әйел – өмір шамшырағы» бағдарламасына өңірдің әлеуметтік-экономикалық дамуына зор үлес қосқан нәзік жандылар қатысты.

Өнер орталығына келген әйелдердің әрқайсысы кәсіби және қоғамдық қызметте үлкен жетістіктерге жеткен. 

"Әйел-Ана - өмірдің өзегі. Тіршіліктің күретамыры, тазалықтың қайнар көзі. Халқымыздың тарихында дана, ақылына көркі сай, ержүрек аруларымыз кем болмаған. «Адамзат - әйелдің алақанында» деген нақыл сөз біздің өміріміздегі әйел қауымының маңызды орнын айқын айшықтайды. Тәуелсіздіктің 30 жылдық тарихына көз жүгіртсек, әр түрлі салаларда ер-азаматтармен қатар еңбекке белсене араласып, өздерінің біліктілігі мен іскерліктерін көрсеткен қарындастарымыз аз емес. Бұлардың қатарында ақ халатты абзал жандар – дәрігерлер, ұрпақ тәрбиелеген ұстаздар, ел экономикасын еселеп жүрген кәсіпкерлер, өндірістің өрісін ашып отырған инженерлер де баршылық. Облыста кәсіпкерлікпен айналысып жүрген қыз-келіншектер де жеткілікті. Жалпы бизнес ұйымдарының төрттен бірі әйелдер қауымының басқаруында. Бұл біздің нәзік жанды қыз-келіншектеріміздің әлеуетін көрсетеді. Мемлекет тарапынан кәсіпкер әйелдерге қолдау көрсету шаралары да жылдан жылға артуда. «Бизнестің жол картасы» бағдарламасы шеңберінде 2019 жылы сегіз жүздей нәзік жандылар грантқа ие болса, өткен жылы мыңнан аса қыз-келіншектеріміз грант алып, өз кәсіптерін ашты",- деді өңір басшысы.

Оңдасын Оразалин мерекелік шараға қатысушыларға Қазақстанды дамытуға елеулі үлес қосып, өркендеуі жолында аянбай қызмет жасап жүргендері үшін ризашылығын білдіріп, сыйлықтар тарту етті. Өңірдің шығармашылық ұжымдары мереке иелеріне арнап концерт берді.

• 09.03.2021
• 198