Интеграция, тұрақтылық және өсім: ЕАДБ кеңесі отырысының қорытындысы

Жуырда ҚР Премьер-министрі Олжас Бектеновтің төрағалығымен Еуразиялық даму банкі кеңесінің (ЕАДБ) отырысы өткізіліп, онда банктің 2024 жылдағы жұмыс қорытындылары қаралып, алдағы кезеңге арналған стратегиялық бағдары белгіленді.

Бұл ретте ЕАДБ-ны 2006 жылы Қазақстан мен Ресей құрып, кейін оған Армения, Қырғызстан, Тәжікстан және Өзбекстан (2024 жылы ресми түрде) қосылғанын еске сала кетейін. Мемлекетаралық инвестициялық банктің негізгі мақсаты – интеграциялық әсері бар, яғни аймақтағы бірнеше елге пайда әкелетін жобаларға қолдау көрсету болып саналады.

2024 жылдың қорытындысы бойынша ЕАДБ инвестициялық портфелі 700 млн долларға артып, 16,5 млрд долларға жетті. Орнықты дамуға салынған инвестициялар 30% асты. Бұл банктің ESG қағидаттарына бағдарын растайтын мақсатты мәннен екі есе көп. Техникалық жәрдемнің жобалық портфелі рекордтық 76% өсіп, ең жоғары тарихи деңгейге жетті.

Қазақстандағы инвестициялық портфель 7,2 млрд долларға артып, оның ішінде сомасы 2,9 млрд доллар болатын 43 жоба бар.

2025 жылдың бірінші жартыжылдығының нәтижелері де айтарлықтай. Мәселен, жаңа жобалардың көлемі 2,1 млрд долларға жетіп, жоғары деңгейлі жобалардың жалпы әлеуеті 4 млрд доллардан асып түсті.

Отырыста ұйымдастырушылық және қаржылық сипаттағы бірқатар шешім қабылданды. ЕАДБ кеңесі төрағасының орынбасары болып сайлану мен үшін үлкен мәртебе. Әріптестерімізбен бірлесіп, көлік инфрақұрылымы, «жасыл» энергетика, цифрландыру және өнеркәсіп интеграциясы сынды стратегиялық бағыттарда бастамаларды ілгерілетуде үйлесімді жұмысты күшейтетінімізге сенімдімін.

• 30.06.2025
• 9