Маңғыстаулық жас химиктер халықаралық Менделеев олимпиадасында топ жарды

2025 жылғы 5–13 мамыр аралығында Бразилияның Белу-Оризонти қаласында өткен 59-Халықаралық Менделеев олимпиадасында Маңғыстау облысының оқушылары жоғары нәтижеге қол жеткізді.

Байрақты білім додасына қатысқан үш оқушының екеуі күміс, біреуі қола медаль иеленді.

Күміс жүлдені “Білім-инновация” лицей-интернатының 10-сынып оқушысы Қалдыбай Меңдіғали мен 11-сынып оқушысы Габдолла Райымбек еншілесе, қола медаль осы білім ордасының тағы бір 11-сынып оқушысы Умарбаев Нұрқожаға бұйырды.

Сонымен қатар, Қалдыбай Меңдіғали “ҮЗДІК ПРАКТИК” атағына ие болды.
Ол 59-Халықаралық Менделеев олимпиадасының практикалық кезеңінде ең жоғары жеке нәтиже көрсетіп, зертханалық жұмыстағы дәлдігі, сенімділігі мен кәсіби шеберлігі үшін марапатталды.

Биылғы олимпиадаға әлемнің 40 елінен іріктелген үздік оқушылар қатысып, білім мен біліктілігін үш кезеңде сынады: екі теориялық және бір практикалық тур. Бұл байқауға әр елден ұлттық олимпиадаларда үздік нәтиже көрсеткен дарынды оқушылар ғана жолдама алды.

Менделеев олимпиадасына қатысу - 2025 жылдың 5–14 шілдесінде Біріккен Араб Әмірліктерінде өтетін Халықаралық химия олимпиадасына (IChO) ұлттық құраманы іріктеу мен дайындаудағы маңызды кезеңдердің бірі болып табылады.

Жүлдегер оқушыларды және оларды жарысқа дайындаған жетекшілерді шын жүректен құттықтаймыз!

• 02.07.2025
• 2