Олжас Құрманбек Қызылкүпте Ханс Циммердің туындысын қобызбен орындады

Қазақтың ұлттық аспабы — қобыз сарыны Маңғыстау даласында әуеледі. Әлемдік сахналарда өнер көрсететін қобызшы Олжас Құрманбек Қызылкүп шатқалында әйгілі композитор Ханс Циммердің «Кариб теңізінің қарақшылары» атты шығармасын қобызбен орындап, ерекше бейнежоба ұсынды, деп хабарлайды Қоғамдық коммуникация орталығы.

- Жалпы мақсатым — қазақтың ұлттық аспабының ерекшелігін, мелодиялық, техникалық мүмкіндігін паш ету. Әлемдік музыканың көркем кеңістігіне кіріктіріп, шетелдік әуен иірімдерімен үндестіре отырып, ұлттық аспаптың тереңдігін халықаралық аудиторияға жеткізгім келеді, – дейді Олжас Құрманбек.

Олжас Құрманбек үшін жасампаз жоба музыкалық тәжірибе ғана емес, мәдени миссия ретінде ерекше маңызға ие. Түсірілім орны ретінде Қызылкүп шатқалының таңдалуы да кездейсоқ емес. Музыканттың айтуынша, Маңғыстау – көздің жауын алатын көрікті жерлерімен, тұмса табиғатымен шабыт сыйлайтын аймақ. Танымал өнерпаз қобыз күйін төгілтіп, еліміздің көркем табиғатын да әлемге паш етуді мақсат еткен.

Олжас Құрманбектің өнері — ұлттық дәстүр мен жаңа заман музыкасының әдемі үндестігі. Оның әр жобасы тыңдарманға жаңа тыныс, қобызға жаңа қыр сыйлайды

• 02.07.2025
• 8