Президент Кеңесшісі Маңғыстау облысының активімен кездесті

Бүгін, 19 мамырда ҚР Президентінің Кеңесшісі Мәлік Отарбаев Маңғыстау өңіріне жұмыс сапарымен келіп, облыс активімен кездесті. Жиынға облыстық қоғамдық кеңес мүшелері, депутаттар, қала, аудан әкімдері, басқарма басшылары мен азаматтық қоғам белсенділері қатысты.

Басқосуды аймақ басшысы Нұрдәулет Қилыбай жүргізіп, Мемлекет басшысының Ұлттық құрылтайдың IV отырысында айқындалған стратегиялық мақсаттар мен міндеттерді өңірлік деңгейде іске асыру мәселелері талқыланды. Атап айтқанда, инфрақұрылымды дамыту, білім мен медицинаны жетілдіру, азаматтық қоғамды нығайту, ауызсумен қамтамасыз ету, цифрлық инфрақұрылымды жетілдіру мәселелері жан-жақты пысықталды.

Мәлік Отарбаев өз сөзінде Мемлекет басшысы Қасым-Жомарт Тоқаевтың Ұлттық құрылтайда белгілеген басымдықтарына тоқталып, өңірлерді дамытуға ерекше назар аударып отырғанын атап өтті.

- Маңғыстау – еліміздің батыс қақпасы. Бұл өңірдің әлеуметтік-экономикалық дамуы Мемлекет басшысының жіті бақылауында. Жаңа экономикалық саясатты жүзеге асыру, инвестиция тарту, инфрақұрылымды жаңғырту, экологиялық, коммуналдық мәселелерді шешу - елдің тұрақты дамуының негізгі тетіктері. Осы орайда идеологияға баса мән беріп, ұлттық құндылықтарды нығайту – маңызды міндеттердің бірі, – деді Мәлік Отарбаев.

Облыс әкімі Нұрдәулет Қилыбай Мемлекет басшысының тапсырмаларын орындау үшін барлық тиісті шаралар қабылданып жатқанын жеткізді.

- Мемлекет басшысы Қасым-Жомарт Тоқаев Бурабайда өткен Ұлттық құрылтайда Маңғыстау өңіріне қатысты медициналық қызмет сапасын арттыру, инфрақұрылымды дамыту, ауыз сумен қамтамасыз ету және цифрлық инфрақұрылымды жетілдіру мәселелерін ерекше атап өтті. Бұл бағыттар біздің өңір үшін аса маңызды. Осы міндеттерді іске асыруда жүйелі жұмыстар атқарылуда, – деді Нұрдәулет Қилыбай.

Жиын барысында қатысушылар өңірдің экономикалық дамуына серпін беретін жобалар мен бастамаларға тоқталып, отбасы құндылықтарын дәріптеу, цифрлық даму және қоғамдық келісімді нығайту жөнінде сөз қозғады.

Маңғыстау облысы әкімінің баспасөз қызметі

• 02.07.2025
• 7