Маңғыстауда қылмыс азайды: Президент кеңесшісі құқық қорғау органдарының өкілдерімен кездесті

ҚР Президентінің кеңесшісі Мәлік Отарбаев Маңғыстауға жұмыс сапары барысында облыстағы құқық қорғау органдарының өкілдерімен кездесті.

Кездесуге Маңғыстау облысы әкімінің орынбасары Тілеген Әбішев пен облыстық полиция департаментінің бастығы Сағындық Аяғанов қатысты. Кездесу барысында өңірдегі қылмыс деңгейінің төмендегені атап өтілді.

– Мемлекет басшысы Қасым-Жомарт Кемелұлы Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауын іске асыру аясында, Ішкі істер министрлігі 2025 жылды «Профилактика жылы: полиция – заң мен тәртіп күзетінде» деп жариялады. «Заң мен тәртіп» қағидатын жүзеге асыру, қоғаммен ашық қарым-қатынас орнату мақсатында жергілікті атқарушы органдармен бірлесіп, тұрғындардың қауіпсіздігін қамтамасыз етуге бағытталған бірқатар шаралар қабылданды. Нәтижесінде соңғы 4 айда өңірдегі криминогендік ахуал тұрақталып, қылмыстың тіркелуі төмендеп, ашылу көрсеткіштері жақсарды. Атап айтқанда, аса ауыр қылмыстар – 71,4%-ға, ауыр қылмыстар – 22,6%-ға, орташа ауырлықтағы қылмыстар – 21,5%-ға, ал онша ауыр емес қылмыстар – 27,0%-ға азайды, – деді Сағындық Аяғанов.

Кездесу барысында Президент кеңесшісі ұлттық құрылтайда көтерілген маңызды мәселелерге тоқталып, құқық қорғау саласының қызметкерлеріне алғысын білдірді.

– Өткен айда Мемлекет басшысы Маңғыстау өңіріне жұмыс сапарымен келіп, бірнеше құқық қорғау органдары өкілдерін арнайы марапаттады. Бұл – Президентіміздің өңірге және сіздердің еңбектеріңізге берген жоғары бағасы. Осы жерде отырған әрбір азамат мемлекеттік марапатқа лайық. Тіпті кейбір азаматтар марапаттан да биік, аса жауапты міндеттерді атқарып отыр. Біз оны жақсы білеміз. Ұлттық құрылтайда Қасым-Жомарт Тоқаев еліміздегі тәртіпті сақтау мен мәдениетті арттыру жайлы баса айтқан болатын. Осы бағытта атқарып жатқан еңбектеріңіз үшін алғыс білдіремін, – деді Мәлік Отарбаев.

• 02.07.2025
• 2