Қазақстан туы астында тұңғыш рет «Құрық–Алят–Құрық» бағытында тұрақты паромдық рейстер іске қосылмақ

5 маусымда Маңғыстау облысының әкімі Нұрдәулет Қилыбай «Georgian Industrial Group» компаниясы директорлар кеңесінің төрағасы Давид Бежуашвилимен кездесті. Басқосуда Каспий теңізіндегі паромдық тасымалды дамытуға бағытталған инвестициялық жоба талқыланды.

Грузиялық инвестор Каспий теңізі арқылы тұрақты жүк тасымалын қамтамасыз ету мақсатында арнайы кемелер сатып алған. 2025 жылдың қыркүйегінен бастап бұл кемелер қазақстандық MSC Middle Corridor Maritime компаниясының басқаруына өтіп, Қазақстан туы астында алғаш рет «Құрық–Алят–Құрық» бағытында тұрақты рейстерді жүзеге асыруды көздеп отыр. Маршрут айына 8–9 рет қатынауды көздейді. Бір кеме бір уақытта 54 фураны тасымалдай алады.
Сонымен қатар, 2027 жылға дейін компания флосына жыл сайын екі кемеден тағы төрт паром қосылмақ. Басқа да паром операторларымен ынтымақтастықты кеңейту бойынша келіссөздер жүргізілуде.

Облыс әкімі Нұрдәулет Қилыбай бұл жоба бастаманың өңірлік логистиканы дамытуға зор серпін беретінін атап өтті.

- Бұл жоба тек Маңғыстау емес, бүкіл еліміз үшін стратегиялық маңызға ие. Біз шетелдік әрі отандық инвесторлармен әріптестік орнатуға әрдайым ашықпыз. Паромдық тасымал жүк айналымын арттырып, сыртқы сауданың өсуіне және көлік легін тиімді басқаруға мүмкіндік береді. Облыс әкімдігі жобаның сәтті жүзеге асуына жан-жақты қолдау көрсетуге дайын, – деді аймақ басшысы.

Сонымен қатар, жиында тараптар басқа да инвестициялық ынтымақтастық, оның ішінде өнеркәсіптік инфрақұрылымды дамыту, агроөнеркәсіп салаларындағы серіктестік мәселелерін талқылады. Давид Бежуашвили Маңғыстау өңірінде бірқатар жобаларды жүзеге асыруға ниетті екенін атты.

Маңғыстау облысы әкімінің баспасөз қызметі

• 02.07.2025
• 3