Ақтауда биыл 20 шақырым жылу желілері жаңартылуда

Ақтауда биыл 20 шақырым жылу желілері жаңартылуда

Ақтау қаласының магистральдық және шағын ауданішілік жылу желілерін жаңғырту жұмыстары қарқынды жүргізілуде. Осы жылы 10 шақырым магистральдық және 10,2 шақырым шағын ауданішілік жылу желілері ауыстырылуда. Бұл туралы Қоғамдық коммуникация орталығында өткен брифингте Маңғыстау облыстық энергетика және тұрғын-үй коммуналдық шаруашылық басқармасының басшысы Бердібек Қартбаев хабарлады.

Спикердің айтуынша, аталған жұмыстардың нәтижесінде жылу желілерінің тозу деңгейі 79%-дан 75%-ке төмендейді.

- Ақтау қаласында 1-6 шағын аудандар(115,3 км) мен 7-24 шағын аудандар(118 км) жылу желілерін қайта жаңартудың жобалық-сметалық құжаттамалары әзірленуде. Жобаның кешенді сараптама қорытындысы осы жылдың екінші жартыжылдығында алынатын болады. Қуаты 360 Гкал/сағат құрайтын жаңа орталық қазандықтың құрылысын салу жоспарланып отыр. Бұл жұмыстар қаланың жаңа шағын аудандарын сапалы жылумен қамтамасыз етуді түпкілікті шешу мақсатында жүргізілуде. Жобаның мемлекеттік сараптамасы мақұлданды. Биыл қазандықтың құрылыс жұмыстарын бастау көзделіп отыр,- деді Бердібек Қартбаев.

Айта кетейік, Ақтау қаласындағы жылу желілерін жаңғырту жұмыстары - тұрғындардың жылумен қамтамасыз етілуін жақсартуға бағытталған маңызды қадам.

• 02.07.2025
• 7