АЗЫҚ-ТҮЛІК БАҒАСЫ БАҚЫЛАУДА

Облыс әкімінің бірінші орынбасары А.Меңдібаевтың төрағалығымен азық-түлік қауіпсіздігі жөніндегі Штабтың кезекті отырысы болып өтті. Жергілікті тауар өндірушілер мен көтерме жеткізушілер мен  сауда желілерінің өкілдері  қатысқан жиында әлеуметтік маңызы бар азық-түлік тауарларына бағаның негізсіз өсуіне жол бермеу және жергілікті өндірушілерді қолдау мәселелері талқыланды. 
2021 жылдың басында сауда кәсіпорындары мен әлеуметтік маңызы бар азық-түлік тауарларын өндірушілерімен «Әлеуметтік маңызы бар азық-түлік тауарларына бағаның негізсіз өсуін болдырмау туралы» 267 меморандумға қол қойылды. Сонымен қатар, әлеуметтік маңызы бар азық-түлік тауарларының жергілікті өндірушілерін қолдау мақсатында өткен жыл «Маңғыстауда жасалған» жобасы ашылып, бүгінде нәтижелі  іске асырылып келеді. Бұл жобаның басты мақсаты өндірушілерге сөре кеңістігін бергені үшін «Ретро бонустар», яғни төлемдер мен жалдау ақысын алып тастау болып табылады.
Өңірдің барлық ірі елді мекендерінде ауыл шаруашылығы тауарларын өндірушілер мен көтерме жеткізушілердің жәрмеңкелері өткізіледі. Онда делдалдарсыз көтерме сауда өнімдері нарықтан 15-20% - ға төмен бағада сатылады. 
Азық-түлік қауіпсіздігін қамтамасыз ету, бағаның күрт ауытқуына және тауарлар тапшылығын болдырмау мақсатында қалалар мен аудандар әкімдіктерінің қызметкерлері күн сайынғы негізде ӘМАТ бағаларына мониторинг жүргізеді.
Кеңес қорытындысы бойынша мемлекеттік органдарға, сондай-ақ облыстағы ірі сауда желілеріне әлеуметтік маңызы бар азық-түлік тауарларының бағасын ұстап тұру бойынша нақты тапсырмалар берілді.
Маңғыстау облысы әкімінің баспасөз қызметі

• 10.03.2021
• 189