Нұрдәулет Қилыбай жаңа үлгіде салынған студенттердің спорт кешенімен танысты

Маңғыстау облысының әкімі Нұрдәулет Қилыбай Қазақстан футбол федерациясының өкілдерімен бірге Yessenov университетінің заманауи үлгіде салынған жаңа спорт кешенінің жұмысымен танысты.

Жалпы аумағы 7000 шаршы метрді құрайтын спорттық нысанның құрамына 1500 орындық стадион кіреді. Кешен студенттердің дене шынықтырумен айналысуына, спорттық жарыстар өткізуге және бұқаралық спортты дамытуға арналған.

Кездесу барысында өңірде футбол спортының дамуы, инфрақұрылымдық қолдау және жастар арасында салауатты өмір салтын насихаттау мәселелері талқыланды. Университет ректоры Берік Ахметов «Каспий» футбол клубының осы алаңда тұрақты түрде жаттығуына және ресми ойындарын өткізуге ұсыныс жасады.

Өңір басшысы жастарды спорттың түрлі бағытына баулудың маңызын атап өтіп, бұл ұсынысты жан-жақты саралап, мамандармен бірлесіп қарастыруды облыстық дене шынықтыру және спорт басқармасының басшысы Мақсат Мұқашқа тапсырды.

Маңғыстау облысы әкімінің баспасөз қызметі

• 02.07.2025
• 9