Маңғыстауда БАҚ қызметкерлері кәсіби мерекеде құрметке бөленді

27 маусым күні Маңғыстау облысында Бұқаралық ақпарат құралдары қызметкерлері күніне арналған салтанатты жиын өтті. Айтулы шараға облыс әкімі Нұрдәулет Қилыбай қатысып, өңірдің журналистика саласының өкілдерін кәсіби мерекелерімен құттықтады.

Өңір басшысы журналистиканың қоғамдағы маңызын ерекше атап өтіп, отандық ақпарат кеңістігін дамытудағы тілшілер қауымының еңбегін жоғары бағалады.

- Қазақ журналистикасының дамуына өлшеусіз үлес қосып жүрген бұқаралық ақпарат құралдарының қызметкерлері әрдайым ерекше құрметке лайық. Жуырда ғана Мемлекет басшысының қолынан үздік журналистер мемлекеттік марапаттарға ие болды. Журналистика - жүгі ауыр, жауапкершілігі жоғары сала. Бүгінде ақпарат айдынында табандылықпен еңбек етіп жүрген тілшілер заманауи медианың мүмкіндіктерін тиімді игеріп, аянбай қызмет етуде. Сіздер елді ынтымаққа, берекеге үндеп, қоғамдағы тұрақтылық пен татулықты нығайтуда билік пен халық арасындағы алтын көпір рөлін атқарып келесіздер. Тәуелсіздік жылдарындағы түрлі сын-қатерлер кезеңінде де журналистер елмен бірге болды. Бұл абыройлы миссияны бүгін де үлкен жауапкершілікпен атқарып келеді. Сала мамандарының адал еңбегі мен ұлт алдындағы қызметі - шынайы құрмет пен марапатқа лайық, - деді Нұрдәулет Қилыбай.

Мерекелік жиын барысында өңірлік журналистика саласының дамуына сүбелі үлес қосқан бірқатар сала ардагерлері мен кәсіби мамандар мемлекеттік және салалық марапаттарға ие болды.

Атап айтқанда, көп жылдық қажырлы еңбегі мен аймақ журналистикасына қосқан үлесі үшін Әнуарбек Жәнібекке «Құрмет» ордені табысталды.

Сондай-ақ «Ерен еңбегі үшін» медалімен баспа басылымы саласында ұзақ жылдар қызмет атқарған журналистика ардагері Жоламан Айдарбаев пен тележурналистика саласының ардагері Таласбаева Ағлен марапатталды.

Айта кетейік, ақпарат кеңістігінде абыройлы еңбек етіп келе жатқан өңірге белгілі тілші, «Маңғыстау-Медиа» ЖШС директорының орынбасары Лаура Тындырғанова жуырда Мемлекет басшысы Қасым-Жомарт Кемелұлының қолынан «Шапағат» медалін алып, ел алғысына бөленді.

Ақпарат саласындағы кәсіби шеберлігі мен жемісті қызметі үшін ҚР Мәдениет және ақпарат министрінің «Ақпарат саласының үздігі» төсбелгісі «Огни Мангистау» газетінің тілшісі Гүлмира Садыроваға, «Қазақстан» телерадиокорпорациясы» АҚ Маңғыстау облыстық филиалының режиссері Айгүл Сарайшыковаға және аудандық «Ақкетік арайы» газетінің редакторы Милана Елеусиноваға табысталды.

Бұдан бөлек, саланың дамуына қосқан үлесі үшін бірқатар журналистер ҚР Мәдениет және ақпарат министрінің Құрмет грамотасы мен Алғыс хаты, сондай-ақ Маңғыстау облысы әкімінің Алғыс хатымен марапатталды.

Шара аясында түбектің төл арнасы “Маңғыстау” телеарнасының 55- жылдығына орай жарық көрген «Елмен бірге – 55 жыл» атты кітаптың тұсауы кесілді.

Маңғыстау облысы әкімінің баспасөз қызметі

• 02.07.2025
• 22