Ақтаудағы мектепке жасанды интеллект жүйесі енгізіледі

Ақтаудағы IT бағытындағы мектеп-лицейінде жасанды интеллектке негізделген басқару және бақылау жүйесі жаңа оқу жылынан бастап толық іске қосылады. Бұл – Маңғыстау өңірінде алғаш рет білім беру процесіне жасанды интеллект технологиясының кең ауқымды енгізілу болмақ.

Енгізіліп жатқан жүйе «Edus» білім беру платформасы арқылы жұмыс істейді. Бұл платформа ата-аналар мен мұғалімдер арасында байланыс орнатып, оқушының оқу жетістіктері, сабаққа қатысуы және мектеп өміріндегі белсенділігі туралы мәліметтерді қолжетімді етеді. Сонымен қатар, төлемдер мен хабарламалар да осы жүйе арқылы жүргізіледі. Жүйе арқылы мектепке келушілер тек Face ID көмегімен мектепке кіреді, бұл оқушылардың қауіпсіздігін қамтамасыз етуге көмегін көрсетеді.

Өңір басшысы Нұрдәулет Қилыбайдың бастамасымен жүзеге асырылып отырған жобаны облысы әкімінің орынбасары Аббат Өрісбаев арнайы барып көріп, жасанды интеллект жүйесінің мүмкіндіктерімен танысты. Әкім орынбасары цифрлық шешімдерге жоғары баға беріп, бұл бастама білім беру саласының тиімділігі мен ашықтығын арттыруға бағытталғанын атап өтті.

Мектеп директоры Анжела Батырованың айтуынша, енгізіліп жатқан жүйе баланың денсаулығын анықтай алады.
 

— Face ID құрылғысы оқушының дене қызуын да автоматты өлшейді. Егер температура жоғары болса, жүйе бұл туралы мектеп директоры, сынып жетекшісі мен медбикеге бірден хабарлама жібереді. Бұл — денсаулық қауіпсіздігін қамтамасыз етудің тиімді құралы, – деді мектеп басшысы.

Ақтаудағы IT мектеп-лицейінің бұл бастамасы — өңірдегі білім беру мекемелерінде цифрлық технологияларды енгізу бойынша маңызды қадам. Жасанды интеллект жүйесінің енгізілуі мектеп ішіндегі процестерді автоматтандырып қана қоймай, оқушының қауіпсіздігін қамтамасыз етуге де септігін тигізбек.

• 02.07.2025
• 7