Маңғыстау облысындағы шалғайда жатқан шағын екі ауылға табиғи газ берілді

3 шілде күні Маңғыстау ауданына қарасты Тиген және Тасмұрын елдімекендеріне табиғи газ берілді.
Жоба Маңғыстау облысының әкімі Нұрдәулет Қилыбайдың тапсырмасымен өңірдің кешенді даму бағдарламасы аясында орындалды.

Ауыл тұрғындарын құттықтауға ҚР Парламенті Мәжілісінің депутаты Еділ Жаңбыршин, Маңғыстау облысы әкімінің орынбасары Аббат Өрісбаев, аудан әкімі Ғалымжан Ниязов, облыстық «AMANAT» партиясының төрағасы Нұрбек Қарасаев, «Qazaqgaz aimaq» АҚ Маңғыстау өндірістік филиал директоры Еркін Жұмағалиев және мердігер ұйым өкілдері барды.

Аудан әкімі Ғалымжан Ниязов жобаның әлеуметтік маңыздылығын атап өтіп, табиғи газдың берілуі ауыл тұрғындарының тұрмысын жеңілдететінін, бұрынғыдай қи мен ағаш жағу қажеттілігі жоқ екенін айтты.
 

- Қазіргі таңда екі елдімекендегі бірнеше үйге газ тартылды. Алдағы уақытта газбен қамтылатын үйлер саны арта түспек. Бұл жұмыстар Маңғыстау ауданында инфрақұрылымды дамытуға және халықтың өмір сапасын жақсарту бағытында облыс әкімі Нұрдәулет Қилыбайдың тапсырмасымен аяқталып отыр. Тартылған газ құбырының жалпы ұзындығы – 50 шақырым. Ауданда үйлерге газ тарту жұмысы толық аяқталды, - деді аудан әкімі Ғалымжан Ниязов.

• 08.07.2025
• 2