Нұрдәулет Қилыбай пробация қызметкерлеріне жаңа автокөлік кілттерін табыстады

8 шілде күні Маңғыстау облысында қылмыстық атқару жүйесі департаментінің материалдық-техникалық базасы заманауи автокөліктермен толықты. Жергілікті бюджет есебінен сатып алынған «Chevrolet Cobalt» маркалы қызметтік көліктің кілтін аймақ басшысы Нұрдәулет Қилыбай салтанатты түрде табыстап, пробация қызметкерлеріне сәттілік тіледі.

Жаңа толық жетекті автокөліктер облыстық қылмыстық атқару жүйесі департаментінің қала және аудандық бөлімшелеріне үлестірілді. Бұл көліктер пробация есебінде тұрған азаматтардың тұрғылықты жеріне жылдам жетуге, қажетті құқықтық, психологиялық және әлеуметтік көмек көрсетуге, сондай-ақ бақылау шараларын уақытылы жүзеге асыруға мүмкіндік береді.

Айта кетейік, биылғы 23 маусымда өткен құқық қорғау органдарының кеңейтілген алқа отырысында Мемлекет басшысы Қасым-Жомарт Тоқаев пробация қызметінің жұмысын жандандыру және материалдық-техникалық әлеуетін нығайту мәселесіне ерекше тоқталған болатын. Аймақта Президенттің тапсырмасына сәйкес бұл бағытта жүйелі жұмыстар жүргізілуде.

Маңғыстау облысы әкімінің баспасөз қызметі

• 09.07.2025
• 6